Rusiya və Ukrayna dövlət başçılarının görüşü baş tutdu. Dünyanın nəzərlərinin bu görüşə kökləndiyi bir məqamda NATO–nun Ukrayna ofisinin rəhbəri Marçin Kojieldən maraqlı olduğu qədər də açıq mesaj gəldi. O, Ukraynanın ərazi və suverenliyinə qəsd olacağı təqdirdə NATO–ya güvənə biləcəklərini bəyan etdi.  

Əslində, bu bəyanatın nəyə və kimə hesablandığı göz önündədir. Alyans rəsmisinin belə bir fikir yürütməsi ilk növbədə Rusiyanın təhdidlərinə qarşıdır. Məlum olduğu kimi, rəsmi Moskva avrointeqrasiya tərəfdarı olan dövlətlərə qarşı hər zaman hədə-qorxu gəlməklə mövqeyini qorumağa çalışıb. Bu hədələrin içərisində iqtisadi və siyasi sanksiyalarla yanaşı, hərbi müdaxilənin də ehtiyat variant kimi irəli sürülməsi Kremlin planlarının tərkib hissəsi olub.

Məhz bu baxımdan NATO Ukraynadakı ofis rəhbərinin dili ilə Kremlə izah etmək istəyir ki, heç də özündən zəif, o cümlədən suverenliyinə qovuşmuş post–sovet respublikaları ilə hədə dilində danışa bilməzsən. Çünki biz nəyin bahasına olursa olsun, həmin ölkələrin arxasındayıq və lazım gələcəyi təqdirdə bu müdafiə NATO səviyyəsində həyata keçiriləcək.

M.Kojielin bu bəyanatı Rusiya prezidenti Vladimir Putinlə, Ukrayna prezidenti Viktor Yanukoviçin kritik görüşü ərəfəsində səsləndirməsi özü də təsadüfü sayıla bilməz. Bu fikir elə bir məqamda səsləndi ki, avrointeqrasiya tərəfdarı olan milyonlarla ukraynalılar məlum görüşün yekun nəticəsindən çox narahatdır. 

Eyni zamanda bu narahatlıq ABŞ və Avropa Birliyi rəsmilərində də var. Çünki nə  ukraynalılar, nə də Qərb V.Yanukoviçin səmimiyyətinə artıq inanmırlar. Baxmayaraq ki, rəsmi Kiyev sözügedən görüşdə Rusiyanın yaratmaq istədiyi Gömrük İttifaqına qoşulacağına dair sazişə imza atmayacağını bəyan etmişdi.

Demək bu inamsızlıq nəticəsində belə bir qənaətə gəlmək olar ki, NATO rəsmisinin məlum bəyanatı həm də birbaşa V.Yanukoviçə ünvanlanıb. Belə ki, əgər Yanukoviç  Putinlə görüşdə Qərbin maraqlarına zidd addım atacaqsa, o zaman onun aqibəti heç də yaxşı olmayacaq. Bu təyziqlər kompleks şəklində həyata keçiriləcək. Qərb bununla həm Putinə, həm də V.Yanukoviçə demək istəyir ki, nə etsəniz belə, Ukraynadan əl çəkmək fikrində deyilik. Və bunu yaxşı anlamalısınız.

Xəbərdən istifadə edərkən istinad etmək vacibdir.