“Mülki geyimdə olan bir neçə şəxs,- görünür, onlar xüsusi xidmət orqanlarının əməkdaşları idi,- Əli İnsanovu məhkəmə zalında mühasirəyə alaraq onu vəkillərindən təcrid etdilər”.

 Bunu virtualaz.org saytının müxbiri ilə söhbətində sabiq səhiyyə nazirinin vəkili Toğrul Babayev deyib.

 Xəbərə görə, vəkillərin məhkəmə proseslərində bir qayda olaraq görünməyən bu mülki geyimli şəxslərin zaldan çıxarılması ilə bağlı verdikləri vəsatətlər qəbul edilməyib.

 “Biz hakimlərə dedik ki, mülki geyimli bu naməlum şəxslər Əli İnsanovun yanında dayanmaqda davam etdikcə biz məhkəmə proseslərinə gəlməkdən ehtiyat edirik. Bizim məhkəmələrdə hələ indiyə qədər belə qanunsuzluq olmamışdı” - deyə T.Babayev bildirib.

 T.Babayev fasilə zamanı sabiq nazirin saxlandığı şüşə qəfəsə yaxınlaşmağa cəhd edib, amma mülki geyimli şəxslər buna imkan verməyiblər və vəkili kobud şəkildə kənara itələyiblər. Vəkilin sözlərinə görə, sabiq nazir onu akvariuma saldıqları üçün məhkəmə heyətindən məhkəmələrə şikayət edəcəyini dedi.

 Prosesin özünə gəlincə isə bu gün Bakı Apelyasiya Məhkəməsində hakim Qədim Babayevin sədrliyi ilə keçirilən proses sabiq nazirin işi üzrə məhkəmə çəkişməsinin davamı idi. Yada salaq ki, Ə.İnsanov onun hüquqlarının pozulduğunu deyərək və Avropa Məhkəməsinin bununla bağlı 14 mart, 2013-cü il tarixli qərarını əsas götürərək məhkəməyə müraciət etmişdi. Proses həmin müraciət əsasında aparılır. Ali Məhkəmənin Plenumu Avropa Məhkəməsinin bu qərarı ilə bağlı məsələni təkrar baxılması üçün Apelyasiya Məhkəməsinə göndərib.

 Artıq xəbər verdiyimiz kimi, Ə.İnsanov bugünkü prosesdə şüşə qəfəsin içinə salınıb. Onun səsini yalnız bir halda eşitmək mümkün olub - hakim mikrofonu açanda. Vəkillər buna etiraz edib. Amma məhkəmə heyəti bu etirazları nəzərə almayıb.

 Bugünkü proses zamanı söz alan Ə.İnsanov xalqı Məhəmməd Əmin Rəsulzadənin 130 illik yubileyi münasibətilə təbrik edib. Sabiq nazirin sözlərinə görə, gün gələcək, böyük öndərin nəşi Ankaradan Bakıya gətirilib dəfn ediləcək.

 İnsanov həmçinin hüquqlarının pozulduğunu bildirib. Deyib ki, ona vəkilləri ilə məsləhətləşmək imkanı verilmir və bu, qanun pozuntusudur.

 Bundan sonra sabiq nazirin digər vəkili Şahverdi Ağaveyis işin birinci instansiya məhkəməsinə qaytarılması və İnsanovun mühafizəsinin götürülməsi barədə vəsatət qaldırdı. Lakin bu vəsatət də rədd olundu. İnsanov özü isə məhkəməni siyasi sifariş yerinə yetirməkdə suçlayaraq bütün ittihamları rədd etdi.

 Növbəti proses fevralın 7-nə təyin olundu.

  *    *    * 16:51

 “Məndən barmaqlıqlar arxasında da qorxursunuz”

 Sabiq səhiyyə naziri Əli İnsanovun məhkəmə prosesi hazırda davam etdirilir.  O, zalda yenə də şüşə qəfəs içində saxlanır.

 Əli İnsanovun bu gün sayca ikinci olan məhkəmə prosesindəki çıxışı haqda əlavə məlumat əldə etmək üçün onun vəkili Toğrul Babayevlə əlaqə saxlayıb.

 Vəkilin sözlərinə görə, Ə.İnsanov hakimlərlə hirsli şəkildə danışaraq bildirib ki, hansı yollara əl atsalar da onun susdura bilməyəcəklər.

 T.Babayevin sözlərinə görə, Ə.İnsanov daha sonra bunları qeyd edib: “Siz bağlı barmaqlıqlar arxasında da məndən qorxursunuz. Məni xalqımdan ayırmaq istəyirsiniz. Amma bunu bacarmayacaqsınız. Sizin gördüyünüz heç bir iş məni qorxutmur. Sizin qanunsuzluqlarınızı ifşa etməyə çalışacam”.

 *    *    *  13:15

 Vəkil Toğrul Babayev virtualaz.org saytına eksklüziv açıqlamasında dedi ki, Əli İnsanov məhkəmədə sərt danışıb: “Sabiq nazir üzünü hakimlərə tutaraq bunları dedi: “Sizin məhkəmələr orta əsr divanxanalarından da betərdir. Siz iqtidarın sifarişini yerinə yetirirsiniz. Bəli, mənim səsimi batıra bilərsiniz. Amma sizin cinayətlər haqda bütün dünya danışır. Mən bir dəfə bu şüşələri qırmışam və yenə də qıracağam. Mənim müraciətlərimin, dediklərimin hamısı haqdır, siz isə nahaqsınız”. Əli müəllim bunları deyəndən sonra hakim iclası tələm-tələsik yekunlaşdırdı”.