Amerika Birləşmiş Ştatların kəşfiyyat strukturlarını birləşdirən Milli Kəşfiyyat Şurası Mərkəzi Asiya regionunda 2014-cü ildə alovlana biləcək münaqişə ocaqları barədə xəbərdarlıq edib.

 Virtualaz.org saytı Qərb mənbələrinə istinadən xəbər verir ki, Amerika kəşfiyyatının hesabatına əsasən Mərkəzi Asiya regionunda potensial təhlükə kimi ilk plana “qeyri-müəyyən siyasi vərəsəlik planları” çıxır. Bura Özbəkistanda yaxınlaşan prezident seçkiləri ərəfəsində hakimiyyət uğrunda güclənən mübarizə də daxildir.

 Hesabatda habelə Tacikistanla Qırğızıstan arasında gərginlik qeyd olunur. Amerika kəşfiyyatının analitiklərinin hesablamalarına görə, Əfqanıstan və “Taliban” hərəkatı hazırda Orta Asiya respublikaları üçün xarici təhlükə kimi qalmaqdadır. Lakin bu regionun ölkələrində potensial qeyri-sabitlik ocaqları xarici təhlükədən daha çox təhdid yaradır. Orta Asiya respublikaları arasında münasibətlər mübahisəli sərhədlərə, enerjiyə və su mübahisələrinə görə gərgin olaraq qalır.

 Cənubi Qafqaza gəldikdə isə Amerika kəşfiyyatı xəbərdarlıq edir ki, Gürcüstanın yeni hökumət koalisiyası üçün əsas problem iqtisadiyyatda yavaşlamadır. Həmçinin yeni hökumət Saakaşvili komandasının keçmiş üzvlərinə qarşı səs-küylü məhkəmə işləri ilə bağlı prosesləri balanslaşdırmalı olacaq. Bildirilir ki, ötən il Rusiya ilə gərginlik nisbətən yumşalıb və münaqişənin yenidən alovlanması riski azalıb.

 Amerika kəşfiyyatı Ermənistan-Azərbaycan münaqişəsinə toxunaraq qeyd edir ki, bu münaqişə ətrafında vəziyyət əvvəlki kimi qalır.

 “Ermənistanla Azərbaycan arasında Dağlıq Qarabağa və ona bitişik ərazilərə görə hökm sürən münaqişənin alovlanması potensialı qalır. Tərəflərdən heç biri hərbi əməliyyatlara yenidən başlamaqda üstünlük görmür. Bununla belə münaqişənin dinc yolla nizamlanması perspektivləri də dumanlı olaraq qalır” - deyə hesabatda bildirilir.

 ABŞ kəşfiyyatı qeyd edir ki, Azərbaycan hərbi xərclərini daha da artırmaq üçün güclü iqtisadi artımı və aşkar hərbi üstünlük əldə etməyi gözləməyə hazırdır. Ermənistan isə status-kvonu saxlamaqda çox maraqlıdır. Çünki etnik ermənilər artıq separatçı Dağlıq Qarabağ regionuna və ona bitişik ətraf rayonlara nəzarət edir. Bununla belə qarşı duran qoşunların mövqelərinin bir-birinə kifayət qədər yaxın olması əvvəlki kimi müharibənin qəfil başlaması riskini saxlayır.

 Xatırladaq ki, yanvarın 20-dən etibarən təmas xəttində gərginlik və toqquşmalar kəskin artıb. Hər iki tərəfdən itkilər olub. Lakin son iki gündə gərginliyin nisbətən azalması müşahidə olunur. ATƏT-in Minsk Qrupunun həmsədrləri fevralın əvvəllərində prezidentlərin görüşünü razılaşdırmaq üçün regiona səfərə gələcəklər.