"Ermənistan beynəlxalq ictimaiyyətin diqqətini “Xocalıya ədalət!” beynəlxalq kampaniyası və Azərbaycana qarşı həyata keçirdiyi təcavüzdən yayındırmaq məqsədilə hazırda Sumqayıt hadisələri barədə təhrif edilmiş məlumatlarla təbliğat aparmaqdadır."

Salamnews xəbər verir ki, bunu Azərbaycanın Argentinadakı səfiri Məmməd Əhmədzadə “Palermo Online” və “Impulso Baires” xəbər saytlarında dərc olunan məqaləsində qeyd edib.

Erməni icmasının radikal qrupunun Azərbaycanın Buenos-Ayresdəki səfirlik binası qarşısında təşkil etdiyi yürüşün məqsədinin də bu olduğunu yazan müəllif bildirib ki, istər azərbaycanlıların, istərsə də ermənilərin həlak olduqları Sumqayıt hadisələri Ermənistanın Azərbaycana qarşı təcavüzünün tarixi kontekstində nəzərdən keçirilməlidir: "Bu təcavüz nəticəsində Azərbaycanın beynəlxalq ictimaiyyət tərəfindən tanınan ərazilərinin 20%-ni təşkil edən Dağlıq Qarabağ və onun ətrafındakı 7 rayon işğal edilib, 1 milyon azərbaycanlı öz torpaqlarından qovulub."

Sumqayıt hadisələrinin tarixi haqqında məlumat verən səfir yazıb ki, Ermənistan rəhbərliyi bu hadisələri geniş anti-Azərbaycan kampaniyasına başlamaq və Azərbaycana qarşı təcavüzünə haqq qazandırmaq məqsədilə düşünülmüş şəkildə icra edib: "Sumqayıtdan sonra daha böyük faciələr baş verib; 1988-ci ildə Ermənistanda onlarla azərbaycanlı öldürülüb, 1990-cı ilin Qara Yanvarında Bakıda 400 azərbaycanlı qətlə yetirilib, 1992-ci ildə Xocalıda 600-dən artıq azərbaycanlıya qarşı soyqırımı törədilib. Sumqayıt hadisələrində məsuliyyət daşıyan şəxslərin ədalət məhkəməsi tərəfindən məhkum olunmalarına baxmayaraq, Ermənistan hərbi qüvvələrinin törətdiyi Xocalı soyqırımının günahkarları bu günədək heç bir cəza almayıb, əksinə, illərdir, Ermənistanda mühüm vəzifələrə sahibdirlər."

Məqalədə, həmçinin göstərilir ki, Azərbaycan münaqişənin beynəlxalq hüquq çərçivəsində sülh yolu ilə və tez bir zamanda həllinə cəhd edir: "Ermənistanın beynəlxalq ictimaiyyətin tələblərini yerinə yetirəcəyinə və hərbi qüvvələrini Azərbaycan ərazilərindən çıxarmaqla azərbaycanlı köçkünlərin yurdlarına qayıtmalarına imkan verəcəyinə güman edirik. Bütün bunlar regionda yeni vəziyyətin yaranmasına, sülhün bərqərar olmasına və Ermənistanın regional əməkdaşlığa cəlb olunmasına şərait yarada bilər."