Sumqayıtda 26 il əvvəl baş verən iğtişaşlar zamanı saxlanılmış erməni soyadı daşıyanların barəsində heç bir araşdırma aparılmayıb, onlar dərhal «zərərçəkən» tərəf kimi azadlığa buraxılıb və çoxu məsuliyyətdən kənarda qalıb. APA TV-nin xəbərinə görə, baş prokurorun birinci müavini Rüstəm Usubov qedib ki, ermənilər hələ də dünya ictimaiyyətini, beynəlxalq təşkilatları bu hadisələrin mahiyyəti ilə əlaqədar aldatmağa çalışmaqdan əl çəkmirlər: “Onlar Sumqayıtda törədilmiş hadisələrin əsl mahiyyətini gizlədərək, Azərbaycan xalqını vəhşi, qaniçən və cinayətkar qismində dünyaya təqdim etmək üçün dəridən-qabıqdan çıxır, Sumqayıt hadisələrini soyqırımı kimi təqdim etməyə çalışırlar və bu istiqamətdə xeyli fəallaşaraq aktiv təbliğatla məşğuldurlar”.

Rüstəm Usubov qeyd edib ki, Sumqayıt hadisələri ilə bağlı Rusiya, Ukrayna, Belarus və Moldova hüquq-mühafizə orqanlarına SSRİ Prokurorluğunun istintaq qrupunun üzvləri barədə məlumatlar əldə edilməsi üçün sorğular verilib.

Sumqayıt hadisələri ilə əlaqədar şəhərə qoşun hissələri yeridilərkən 4 azərbaycanlının öldürülməsinə dair Bakı Qarnizonu Hərbi Prokurorluğunda cinayət işi istintaq olunub və işin icraatına əsassız olaraq xitam verilib.

Baş prokurorun birinci müavini bildirib ki, Sumqayıtda «Krunk» təşkilatının emissarlardan biri o vaxt Qarabağdan Sumqayıta hərbi komissar kimi göndərilən Kalantarov soyadlı erməni polkovnik olub. O, buradakı ermənilərin hamısının siyahısını və ünvanlarını bilib, hadisələr ərəfəsində iş yerini dəyişmək adı ilə aradan çıxıb. Sumqayıtda zərərçəkən, öldürülən ermənilərin əksəriyyəti «Krunk» cəmiyyətinə könüllü maddi vəsait köçürməkdən imtina edib.

Bakıda "Sumqayıt 1988: Cinayət və cəza" kitabının təqdimatı keçirilib.