"Rusiya və Fransa ilə yanaşı, ABŞ-ın da vəzifəsi Ermənistan-Azərbaycan Dağlıq Qarabağ münaqişəsinin həllinə dair vasitəçilik missiyasını həyata keçirməkdir."

İnterAz xəbər verir ki, bunu Azərbaycan Xarici İşlər Nazirliyinin (XİN) mətbuat xidmətinin rəhbəri Elman Abdullayev şəxsi "Facebook" səhifəsində yazıb.

O, qeyd edib ki, rəsmi Bakı ilə İrəvan arasında münaqişənin həllinə dair danışıqlarda vasitəçilik edən həmsədr ölkələrin vəzifəsi ədalətin bərpasına nail olmaqdır: "Ədalətin bərpası Ermənistanın hörmətsizlik etdiyi beynəlxalq hüququn norma və prinsiplərinə riayət etməsinə məcbur olunmasıdır. Həmsədr ölkələrin mesajı məhz bu olmalıdır. Ceyms Uorlik, münaqişənin həlli prosesinin həssas bir dövr yaşadığını nəzərə alaraq, məsələ ilə bağlı mesaj verərkən ehtiyatlı olmalıdır. Axı, söhbət beynəlxalq hüququn pozulmasından və Azərbaycan xalqının üzləşdiyi faciədən gedir."