“Rusiya, Fransa ilə yanaşı ABŞ-ın da vəzifəsi Azərbaycan və Ermənistan arasında münaqişənin həllinə dair vasitəçilik missiyasını həyata keçirməkdir. Bu gün rəsmi Bakı ilə rəsmi İrəvan arasında Ermənistan -  Azərbaycan münaqişəsinin həllinə dair danışıqlarda vasitəçilik edən həmsədr ölkələrin vəzifəsi ədalətin bərpasına nail olmaqdır”.

Bu barədə Azərbaycan Xarici İşlər Nazirliyinin mətbuat xidmətinin rəhbəri Elman Abdullayev öz Facebook səhifəsində ATƏT-in Minsk qrupunun ABŞ-dan olan həmsədri Ceyms Uorlikin Twiterde paylaşdığı fikirlərə münasibət bildirərək deyib.

Diplomat vurğulayıb ki, ədalətin bərpası Ermənistanın hələ də hörmətsizlik etməkdə davam etdiyi beynəlxalq hüququn norma və prinsiplərinə riayət etməsinə məcbur edilməsidir: “Həmsədr ölkələrin mesajı məhz bu olmalıdır: münaqişənin həlli prosesinin həssas dönəm yaşadığını nəzərə alaraq, Ceyms Uorlik münaqişənin həlli ilə bağlı mesaj verərkən ehtiyatlı olmalıdır. Axı söhbət beynəlxalq hüququn pozulmasından və Azərbaycan xalqının üzləşdiyi humanitar faciədən gedir”.

Xatırladaq ki,  C.Uorlik Azərbaycan və Ermənistan XİN başçılarının görüşü zamanı, münaqişənin Dağlıq Qarabağ və Azərbaycan arasında olduğunu qeyd edib: “Hər halda biz münaqişənin hər tərəf üçün sülhlə həllini istəyirik”.

*    *     *14:31

Minsk Qrupunun amerikalı həmsədri Ceyms Uorlik Hollandiyanın paytaxtı Haaqada nüvə təhlükəsizliyi sammiti çərçivəsində Dağlıq Qarabağ münaqişəsinə dair keçirilən məsləhətləşmələrdən sonra daşıdığı missiyaya nə dərəcədə qeyri-ciddi yanaşdığını və özünün o qədər də peşəkar olmadığını ortaya qoyan mesaj yayımlayıb. 

Minsk Qrupuna həmsədr təyin olunduqdan sonra regiona səfərləri və münaqişə tərəflərinin  rəsmiləri ilə təmasları barədə məlumatları Twitter sosial şəbəkəsində paylaşan diplomat Haaqada Azərbaycan və Ermənistan xarici işlər nazirləri ilə ayrı-ayrılıqda görüşüb. Həmçinin martın 23-də Ermənistan prezidenti Serj Sərkisyanla təmasda olub. 

Ceyms Uorlik əvvəlcə belə Twitter mesajı paylaşıb: “Azərbaycan və Ermənistan xarici işlər nazirləri ilə pozitiv görüşlər keçirdik. Birlikdə işləyirik, sülh mümkündür”. 

Daha sonra amerikalı diplomat növbəti tvit atıb:” Bu gün mənə düzəliş verdilər. Bu münaqişə Dağlıq Qarabağla Azərbaycan arasındadır. Biz Qarabağ münaqişəsinin bütün tərəflər üçün dinc yolla nizamlanmasını istəyirik”. 

Ceyms Uorlikə kim düzəliş verib, diplomat bunu dəqiqləşdirmir. Lakin buna şübhə yoxdur ki, ona düzəliş verən ya Ermənistanın xarici işlər naziri, ya prezidentidir. Çünki Ermənistan həmişə münaqişənin guya “Dağlıq Qarabağla Azərbaycan arasında baş verdiyinə” dair çürük arqumenti sırımağa çalışır. Bəs amerikalı diplomat niyə bu qeyri-ciddi və hətta sərsəm tezisi tələsik Twitter-də paylaşıb? Bəyəm onu Minsk Qrupuna həmsədr göndərməzdən əvvəl Dövlət Departamentində Dağlıq Qarabağ münaqişəsi barədə məlumatlandırmayıblar? Əgər bir ildən çoxdur guya münaqişənin nizamlanması məsələləri ilə məşğul olan Ceyms Uorlik hələ indi bu münaqişənin tərəflərinin “ancaq Dağlıq Qarabağ və Azərbaycan olduğunu” başa düşübsə o zaman onun hansı ağılda və qabiliyyətdə olduğu ortaya çıxır. 

Minsk Qrupuna təyin olunduqdan sonra gah Ledi Qaqa ilə çəkdirdiyi şəkillləri sosial şəbəkədə paylaşan, gah ermənilərin ona verdiyi qonaqlığı tərifləyən, gah Azərbaycan pitisinin doğrudan da dadlı olduğu haqda tvit atan Ceyms Uorlik artıq Amerikanın Qarabağ münaqişəsinin nizamlanması üzrə indiyədək təyin etdiyi diplomatlar arasında ən qeyri-ciddi adam imici qazana bilib. Məsələn, o, ötən həftə növbəti tvit ataraq yazmışdı ki, Azərbaycan və Ermənistan prezidentlərinin Haaqada görüşünü səbrsizliklə gözləyir.

Lakin prezidentlərin nüvə təhlükəsizliyi sammitində görüşünün razılaşdırıldığını nə rəsmi Bakı, nə İrəvan təsdiqləmir. Onsuz da nüfuzunu itirmiş və 20 ildir Qarabağ münaqişəsinin nizamlanması üçün heç nə edə bilməyən Minsk Qrupuna bu cür qeyri-ciddi və sosial şəbəkələrdə ağlına gələni yazan diplomatı təyin etmək ABŞ administrasiyasının nəyinə lazım idi? Regionda onsuz da azalan nüfuzuna daha bir zərbə vurmağa? (virtualaz.org)