Qabil Hüseynli: “Qərbin əlinə unikal bir imkan düşüb ki, Rusiya ilə məsələləri axıra qədər çürütsün”
“Qərbin dişsiz siyasəti nəticədə Rusiyanın Ukraynada istədiyini həyata keçirməsinə gətirib çıxarıb”. Son vaxtlar Ukraynada baş verənlərə münasibətdə belə qənaətə tez-tez rast gəlmək olar. Bəzi ekspertlər isə iddia edir ki, indiyə qədər Rusiyaya qarşı qəbul edilən sanksiyalar Kremlə təsir eləməsə də həmin sanksiyaların effekti bir müddət keçdikdən sonra özünü göstərəcək.
Politoloq Qabil Hüseynli bu mövzuda bizimlə söhbətində Qərbin Ukrayna məsələsində dişsiz siyasətinin Rusiyanın əl-qolunu açmasına stimul verdiyi barədə deyilənləri bölüşdüyünü bildirdi: “ABŞ tərəfi nisbətən fəal olsa da, - əlbəttə ki, bura Barak Obamanı daxil etmirəm, indi meydanda daha çox Con Kerrinin səsi eşidilir, - yetərli deyil. Amerikanın Rusiyaya qarşı siyasətinin kəsərli olması haqqında fikir söyləmək çətindir. Çünki Reyqan dönəminin formalaşdırdığı müəyyən yanaşmalar və dəyərlər sistemi bu gün ABŞ-ın xarici siyasətində açıq-aydın hiss olunmur”.
Politoloqun fikrincə, bununla yanaşı, Rusiya bu sanksiyalardan əziyyət çəkməyəcək və həmişə ayaqda dik duracaq fikrini də söyləmək çətindir: “Sanksiyaların hələ bir çoxu tətbiq edilməyib, tədricən tətbiq edilir. Onların pik dövrü yayda, məsələn, iyun ayında özünü hiss etdirməlidir. Açığını demək lazımdır, əgər Qərb bu məsələdə Rusiyaya uduzsa, Rusiyanın qabağını saxlamaq mümkün olmayacaq. Amma Qərb vəziyyətin unikal olduğunu başa düşür. Vəziyyətin unikallığı bir də ondan ibarətdir ki, bir tərəfdən Qərb və Rusiya münasibətlərinin taleyi həll olunur, o biri tərəfdən isə Qərbin əlinə unikal imkan düşüb ki, Rusiya ilə məsələləri axıra qədər çürütsün. Əgər bunu edə bilməsə, Qərbin özünün bir sıra problemlərlə üzləşə biləcəyini söyləmək mümkündür. Lakin mən inanmıram ki, Qərb tarixdə çox rastlanmayan bu şansdan yararlanmasın, yararlana bilməsin”.
Q.Hüseynlinin sözlərinə görə, məsələnin digər təəccüblü tərəfi ondan ibarətdir ki, 20 ildən çoxdur müstəqillik dövrünə qədəm qoymuş Ukraynada bu müddət ərzində ordu quruculuğu çox aşağı səviyyədə olub. Demək olar ki, ordu özünümüdafiə qüvvələri səviyyəsində də inkişaf etdirilməyib: “Prezident Kravçukdan başlamış Yanukoviçə qədər Ukraynanın bütün prezidentlərini buna görə ciddi şəkildə təqsirləndirmək lazımdır. Heyrətedici fakt ondan ibarətdir ki, bütün dövrlərdə Ukraynanın müdafiə naziri olmuş şəxslər Rusiya vətəndaşları olublar. Yanukoviç dövründə müdafiə naziri olmuş şəxs hətta Rusiya qəhrəmanı idi. Bütün bunlar onu göstərir ki, müstəqillik illərində Ukraynanın müdafiə sənayesi, ordu quruculuğu bütünlüklə Rusiya Mərkəzi Kəşfiyyat İdarəsinin nəzarəti altında olub. O səbəbdən də Rusiya Ukraynada ordu quruculuğunu istədiyi kimi ləngidə bilib. Nəticədə indi Ukrayna ordusu ölkənin ərazi bütövlüyünü müdafiə edə bilmir. Guya Qərbin ”ağ at" üstündə gəlib Ukraynanı düşmənlərdən xilas edəcəyinə ümid etmək Ukrayna xalqı üçün böyük səhv olardı. Qərb, xüsusilə Avropa Birliyinə daxil olan ölkələr bir çox məsələlərdə hələ də Rusiyadan asılıdırlar. Məsələn, təbii qaz məsələsində ciddi asılılıq var. İndi spesifik bir şərait yaranıb. Qərb, ilk növbədə ABŞ ciddi surətdə düşünməlidir. Onsuz da xeyli vaxt itirilib. Onlar Rusiya ilə münasibətlərə aydınlıq gətirməlidirlər. Gecikmə bundan sonra da davam edəcəksə, Qərb Rusiyanın qarşısını heç yerdə ala bilməyəcək".(musavat.com)
Xəbərdən istifadə edərkən istinad etmək vacibdir.
