“Siyasilərin elmi fəaliyyəti” rubrikasında növbə eks-baş nazir və Xalq Partiyasının sədri Pənah Hüseyndir.

Nə qədər emosional bir fiqur kimi tanınsa da, onu praqmatik, məntiqli bir şəxs kimi xarakterizə edirlər. Eks-spiker Rəsul Quliyev də P.Hüseyn haqqında məhz bu fikirdədir: “AXC hakimiyyətinin yeganə real və məntiqlə düşünən nümayəndəsi Pənah Hüseyndir”. 
Bu xüsusiyyət təbii ki, öz-özünə formalaşmayıb. Elm yolundan adlayaraq siyasətə keçməsi onda bu xüsusiyyəti meydana gətirib. 1979-cu ildə Azərbaycan Dövlət Universitetinin (indiki BDU) tarix fakültəsini bitirən Pənah Hüseyn üç il Sabirabad rayonunda kənd orta məktəbinin müəllimi və rayon tarix muzeyinin işçisi olub. 1986-cı ildən Azərbaycan EA-nın Fəlsəfə və Hüquq İnstitutunda laborant, kiçik elmi işçi, elmi işçi vəzifələrində çalışıb. 

1988-1993-cü illərdə aktiv siyasi fəaliyyətlə məşğul olan P.Hüseyn elmdən tam olaraq ayrılıb. Milli Azadlıq Hərəkatının iştirakçısı, Azərbaycan Xalq Cəbhəsinin yaradıcılarından biri olub. 1992-ci ildə Azərbaycan Respublikasının dövlət katibi, 1993-cü ildə qısa müddətdə (aprel 1993 – iyun 1993-cü il) Azərbaycan Respublikasının baş naziri vəzifələrini tutub. 

Xalq Cəbhəsinin süqutundan sonra P.Hüseyn yenidən elmə qayıdır. 1997-2000-ci illərdə AMEA-nın Fəlsəfə və Hüquq İnstitutunun elmi işçisi olub.

Pənah Hüseynin elmi fəaliyyəti milli-dini və elmi aspektlərin sintezini özündə əks etdirməyə  çalışıb. Onun diplom işi “İslam sosializmi” olub. Bu səbəbdən Quranı oxuyub ondan istifadə etmək məcburiyyətində qalıb. Formalaşdığı dindar kənd mühiti sanki genetik yaddaş kimi özünə qayıdıb. Akademiyanın Fəlsəfə və Hüquq İnstitutunda kiçik elmi işçi olarkən də bu üçlü sintez – millilik, islamilik və liberallıq onun əsas fəaliyyət sahəsi olur. 

Mətbuatda verdiyi müsahibələrinin birində Pənah Hüseyn bu barədə danışır:

“Mən dindar mühitdə böyümüşəm. Ancaq uşaqlığımda və gəncliyimdə ideyalı ateist olmuşam. Universitetdə diplom işim “İslam sosializmi” mövzusu idi. Mövzu ilə bağlı Quranı da öyrənməli oldum. Ərəbcə bilmədiyimə görə rusca tərcüməsini oxuyurdum. Bir də gördüm ateist deyiləm. Ancaq ateist olmamaq bir şeydir,  dindar olmaq başqa şey...”.

Hazırda Pənah Hüseyn elmdən tam uzaqlaşıb. Modern.az-a bu barədə danışarkən də həmin soyuqluq hiss olunurdu. Belə ki, namizədlik dissertasiyasını yazsa da, onu müdafiə etmək fikrində olmadığını  deyən P.Hüseyn üçün elm artıq çoxdan unudulmuş bir sahədir. 

“Təxminən 1997-ci ildən sonra yenidən  akademiyanın əməkdaşı olmuşam. Ondan sonra davam etdirmədim. Hazırda peşəkar elmi fəaliyyətlə məşğul deyiləm. Namizədlik dissertasiyamı yazmışam, ancaq müdafiə etməmişəm. Gələcəkdə də çətin ki, müdafiə edim. Artıq elmdən tam olaraq uzaqlaşmışam. Dissertasiya mövzum fəlsəfə sahəsinə aid idi. Milli şüurda dini məsələlərlə əlaqəli idi. Yəni rus dilində yazmışdım. Təxminən o istiqamətdə idi. Amma müdafiə etmədim“.