Bütün İrəvan şok içərisindədir.
Ermənistan Azərbaycan və ya Türkiyə məhsullarının idxalına qadağa qoya bilməz.
İstiPress-in erməni KİV-nə istinadən verdiyi məlumata görə, bunu Ermənistan istehlakçılarının məsləhətləşmələr mərkəzinin rəhbəri, Kənd təsərrüfatı alyansının üzvü Karen Çilinqaryan deyib.
"Ermənistan Ümumdünya ticarət təşkilatının üzvüdür. Buna görə də İrəvanın hansısa ölkənin məhsullarına qadağa qoymağa ixtiyarı yoxdur. Əgər həmin məhsullarda sanitar normalar pozulubsa, bunu edə bilər. Əks halda Ermənistan pis vəziyyətdə qalacaq”, - deyə K.Çilinqaryan bildirib.
Ekspertin sözlərinə görə, hüquq-mühafizə orqanları yalnız məhsulların qaçaqmalçılıq yolu ilə ölkəyə gətirilib-gətirilmədiyini, korrupsiya faktlarının olub-olmadığını araşdıra bilər.
"Bizim hesablamalarımıza görə, 10 tonlarla Azərbaycan məhsulu Ermənistana qeyri-qanuni yolla gətirilib”, - deyə eskpert bildirib.
"Newsarmenia” saytının məlumatına görə, İrəvanla yanaşı, 13 rayon və şəhərində Azərbaycanda yetişdirilən almaların peyda olması məsələsi o qədər ciddiləşib ki, məhsulun ölkəyə necə daxil olması ilə bağlı cinayət işi açılıb. Cinayət işi çərçivəsində bir neçə gömrük məmuru işdən çıxarılıb.
Bu barədə Ermənistanın dövlət gəlirləri komitəsi Azərbaycan almalarının İrəvan bazarlarında və supermarketlərində kütləvi satışı ilə bağlı rəsmi açıqlama yayıb.
Bildirilir ki, cinayət işi birbaşa Baş prokurorluq tərəfindən qaldırılıb və ciddi şəkildə nəzarət edilir.
"Komitə Azərbaycan almalarının erməni bazarlarında satılması ilə bağlı detalları araşdırmaq üçün müxtəlif satış məntəqələrində əməliyyat-axtarış tədbirləri keçirib. Habelə ərzaq təhlükəsizliyi Dövlət Komitəsinin təqdim etdiyi digər ünvanlara baxıb”, - deyə Komitənin açıqlamasında qeyd olunur.
"Toplanılan materiallara əsasən müəyyən olunub ki, qanunsuz sahibkarlıq fəaliyyəti ilə məşğul olan bir qrup şəxs periodik olaraq ticarət məqsədi ilə sərhədi keçiblər, ölkə ərazisinə kommersiya məqsədi ilə kənd təsərrüfatı məhsulları idxal ediblər, bu zaman "Baqrataşen” sərhəd-keçid məntəqəsinin (Gürcüstan-Ermənistan sərhədi) gömrük əməkdaşlarına rüşvət veriblər.”
Nəticədə toplanılmış faktlar əsasında həmin gömrük əməkdaşları barəsində rüşvət alma maddəsi ilə cinayət işi qaldırılıb. Azərbaycan almalarının gömrükçülərə rüşvət verməklə Ermənistana qeyri-leqal idxalını həyata keçirən bir qrup şəxs barəsində isə qanunsuz sahibkarlıq maddəsi ilə cinayət işi qaldırılıb.
Toplanılan materiallar istintaqın davam etdirilməsi üçün Baş prokurorluğa təqdim olunub. "Dövlət gəlirləri Komitəsi bütün sərhəd-nəzarət məntəqələrinə tapşırıq verib ki, gələcəkdə belə halların istisna edilməsi üçün ciddi nəzarət tətbiq edilsin” - açıqlamada deyilir.
İrəvan bazarlarından birində Azərbaycanın Quba rayonunda fəaliyyət göstərən "DAD Fruits” şirkətinin bağlarının məhsulu olan almaların satışı Ermənistanda bomba effekti yaradıb və bütün müvafiq dövlət strukturları, mətbuat Azərbaycan almalarının izinə düşüb.
Məlum olub ki, Azərbaycan almalarının Ermənistan bazarlarında satışı yeni deyilmiş və əslində "DAD” almaları İrəvanın əksər bazarlarında, supermarketlərində satılırmış.
Dövlət strukturları bu məsələyə isterik reaksiya veriblər və tələm-tələsik Azərbaycan almalarını hansı yolla ölkəyə daxil olduğunu araşdırmağa başlayıblar, habelə meyvəni bazarlardan yığışdırıb məhv etməyə çalışıblar.
"DAD” şirkətindən virtualaz.org-a bildirmişdilər ki, almaların Ermənistana Gürcüstan üzərindən keçirildiyini təxmin edirlər. Çünki şirkət Gürcüstana məhsul ixrac edir.

Xəbərdən istifadə edərkən istinad etmək vacibdir.