“Hərbi əməliyyatların yenilənmə təhlükəsi nə Azərbaycandan, nə də  Ermənistandan asılıdır”.  

 Bu sözləri “Axar.az”a açıqlamasında politoloq Ərəstun Oruclu deyib.   O, artıq atəşkəs haqda Bişkek müqaviləsinin qüvvəsini itirdiyini bildirib:   

“Müqavilənin bəndləri dəqiq yadımda deyil, amma bildiyim qədər ilə, o 20 illiyə imzalanmışdı. Elə bu müddət ərzində də sülh prosesinin həyat keçirilməsi nəzərdə tutulmuşdu. Belə yanaşsaq görürük ki, artıq müqavilənin müddəti başa çatıb. Əgər bunun vaxtının uzadılması ilə bağlı xüsusi saziş imzalanmırsa, o, qüvvəsini itirmiş sayıla bilər. O ki qaldı atəşkəsin sırf Bişkek müqaviləsindən asılı olmasına, mən buna inanmıram. 

Mətbuatda tez-tez fikir səslənir ki, guya atəşkəsin saxlanması, hərbi əməliyyatların başlanmaması məhz Bişkek müqaviləsi ilə tənzimlənir. Bu hardasa birtərəfli yanaşmadır. Məsələ burasındadır ki, həm Azərbaycan, həm Ermənistan ATƏT, Avropa Şurası və digər beynəlxalq təşkilatlara üzv olan zaman Dağlıq Qarabağda hərbi əməliyyatların başlamayacağı ilə bağlı öhdəliklər götürüb. Bir sıra yerlərdə bu, sənədlərdə əks olunub, bəzilərində fəxri xarakter daşıyır və xüsusi əlavələr qəbul olunub. Bildiyim qədər ilə, həm Avropa Birliyi Şərq Tərəfdaşlığı proqramında, həm də NATO ilə Sülh Tərəfdaşlığı Proqramında hər iki tərəf bunu öhdəlik kimi öz üzərinə götürüb”.  

 Politoloq hər iki tərəfin Qarabağda hərbi əməliyyatlara özlərinin verdiyi qərarla başlamayacığını deyib:   “Hərbi əməliyyatların yenilənmə təhlükəsinə gəlincə isə, yaxşı bilirik ki, bu nə Azərbaycandan, nə də Ermənistandan asılıdır. Bu, münaqişənin arxasında duran böyük maraqlardan asılıdır. 

Biz gördük ki, həmin böyük maraqlardan biri olan Rusiyanın burada daha çox marağı var. O, Ukraynada cəsarət tapıb çox dərinə gedə bilmədi. Bu gün ya birbaşa, ya dolayısı ilə hərbi əməliyyatlara qatılmaq böyük itkilər vermək deməkdir. Rusiya Ukraynanın şərqində bunu özünə rəva görə bilmədi və Krımla kifayətlənərək böyük iddialarından əl çəkdi. İndi onun ikinci bir bölgədə hərbi tərəfdaşının, yəni  Ermənistanın vasitəsilə müharibəyə gedəcəyini düşünmək sadəlövhlük olardı. 

Bu gün hərbi qarşıdurma heç kimə lazım deyil. Azərbaycan və Ermənistan bu məsələdə söz sahibi olmasına inanmıram. Dediyim öhdəliklərdən heç biri imkan vermir ki, bu ölkələr özbaşına qərar versinlər. Bu gün hər iki tərəfdən hərbi əməliyyatlar haqqında deyilən sözlər reallığa dayanmır”. 

  Qeyd edək ki, mayın 12-də Bişkek müqaviləsinin imzalanmasının 20 ili tamam olacaq.