“Heydər Əliyev Fondunun prezidenti, Milli Məclisin deputatı, görkəmli ictimai xadim Mehriban Əliyevanın dünyada “İlin Birinci Xanımı” seçilməsi Azərbaycan tarixinin qürurverici səhifələrindən biridir”. Bunu SİA-ya millət vəkili, professor Musa Qasımlı deyib.

Parlament üzvünün sözlərinə görə, bu seçim gerçəkliyi tamamilə əks etdirir: “Mehriban Əliyeva özünün həm ölkə daxilində, həm də beynəlxalq aləmdəki fəaliyyəti ilə Azərbaycan xalqının və dövlətinin başını uca edib. Fransanın məşhur Luvr muzeyində İslam mədəniyyəti şöbəsinin yaradılması və təmiri, Avropanın bir sıra ölkələrində dini ocaqların bərpası, Pakistanda məktəb tikintisi, Rusiyada mədəni sahələrdə bir sıra işlərin görülməsi və s. Heydər Əliyev Fondu və onun prezidenti Mehriban Əliyevanın dünyada artan nüfuzunun göstəricisidir. Bu seçim eyni zamanda Azərbaycan qadınının, zəkasının və bacarığının göstəricisidir”.

Qeyd edək ki, ötən gün "The Business Year: Azərbaycan-2014" jurnalı Heydər Əliyev Fondunun prezidenti Mehriban Əliyevanı Azərbaycanın ictimai, sosial və mədəni həyatında fəal iştirakına, cəmiyyətin dinamik inkişafına verdiyi mühüm töhfələrə, mədəniyyətimizin dünyada təbliği sahəsində əvəzsiz xidmətlərinə, həmçinin ümumdünya mədəni irsinin qorunub-saxlanması işinə hərtərəfli dəstəyinə, sosial ədalət və humanizm prinsiplərinə sadiqliyinə görə dünyada “İlin Birinci Xanımı” elan edib.