“ATƏT-in Parlament Assambleyasının (ATƏT PA) Bakıda keçiriləcək sessiyasında erməni deputatlar da iştirak edəcək”. Bunu Modern.az saytına açıqlamasında Azərbaycanın ATƏT PA-dakı nümayəndə heyətinin üzvü, millət vəkili Eldar İbrahimov deyib.
“Hər komitədən bir nəfər olmaqla, çox vaxt erməni deputatlardan 4-5 nəfər iştirak edir. Ona görə də Bakıya neçə nəfər erməni deputatın gələcəyini qabaqcadan demək çətindir. Sadəcə olaraq, Ermənistandan olan deputatlar ATƏT Parlament Assambleyasının Bakıda keçiriləcək sessiyasına dəvəti qəbul ediblər”.
Deputatın sözlərinə görə, iclasa dəvət olunan deputatların təsdiq olunması məsələsinə ATƏT Parlament Assambleyası baxır.
“Ona görə də iştirakçıların hansı ölkələrdən olacağı iclas zamanı bilinəcək. Çox güman ki, Ermənistandan qrupun rəhbəri Peqamyan Netaşes iştirak edəcək”-deyə Eldar İbrahimov bildirib.
Xatırladaq ki, ATƏT-in Parlament Assambleyasının Bakıda keçiriləcək 23-cü sessiyası bir həftə sonra iyun ayının 28-dən iyul ayının 2-dək davam edəcək.
Xəbərdən istifadə edərkən istinad etmək vacibdir.
