Modern.az saytı“Siyasilərin elmi fəaliyyəti” rubrikasında növbəti yazını təqdim edir. Bu dəfə tanınmış politoloq Qabil Hüseynlinin elmi fəaliyyətindən söhbət açılacaq.

Qabil Hüseynli hazırda fəlsəfə elmləri, doktoru professordur. Aktiv siyasi fəaliyyətinə baxmayaraq o, elmdən də ayrılmayıb. 1977-ci ildən bəri bitirdiyi Azərbaycan Texniki Universitetinin sosiologiya və fəlsəfə kafedrasının müdiri olub. Hazırda həmin kafedranın professoru kimi elmi-pedaqoji fəaliyyətini davam etdirir. Bir müddət AMİP-in, daha sonra isə Müsavat Partiyasının əsas simalarından olan Q.Hüseynli siyasi həyata tam köklənsə də, ən ciddi fəlsəfi-humanitar aspektdə - sufizm və orta əsr Azərbaycan fəlsəfəsi istiqamətlərində araşdırmalar aparıb. O, 1983-cü ildə elmlər namizədi, 1991-ci ildə isə elmlər doktoru dərəcələrinə yüksəlib. Politoloq-professor öz elmi fəaliyyəti haqqında bunları danışır:

“Akademiyanın Fəlsəfə, Sosiologiya və Hüquq İnstitutunun nəzdində aspiranturanı bitirmişəm. “Milli qürur hissinin formalaşması və onun mədəniyyətlərin tənzimləməsində rolu” mövzusunda namizədlik dissertasiyasını müdafiə etmişəm. Namizədlik dissertasiyasını müdafiə edərkən onlarca məqalə və kitabların müəllifi olmuşam. Bu kitabların içində “Milli qürur hiss və onun sosial-fəlsəfi aspektləri” istiqamətində monoqrafiya yazmışam. Kitablarımın arasında “Milli iftixar hissi” adlı broşüra və fəlsəfi istiqamətdə bir neçə monoqrafiyalarım var. Məsələn, “Orta əsr Azərbaycan fəlsəfəsi” adlı kitab yazdım. Orada əsasən sufilik fəlsəfəsi, Bəhmənyarın fəlsəfi fikirlərini, Sührəverdinin işraqilik təlimi və Şah İsmayıl Xətainin fəlsəfi görüşlərini “Dəhnamə”  əsərinin timsalında şərh etmişəm.

Sufi fəlsəfəsinin mahiyyəti haqqında ayrıca bir kitabın həm müəllifiyəm. Sonradan doktorluq dissertasiyası üzərində  iş apardım. Doktorluq dissertasiyamın mövzusu “Müasir sivilizasiya və milli identifikasiyanın dialektikası” olub. Doktorluq işimi 1991-ci ildə müdafiə etdim. 1983-cü ildə namizədlik, 1991-ci ildə isə doktorluq dissertasiyamı yazdım.  Doktorluq dissertasiyamı müdafiə edənə qədər dosent,  ondan sonra isə professor adını aldım. Hazırda fəlsəfə elmlər doktoru, professoram. 21 elmi əsər, beş monoqrafiya, metodik və tədris məsələlərinə aid kitab yazmışam. 200-ə qədər elmi məqalənin müəllifiyəm. 1977-ci ildən pedaqoji işlə məşğulam. Texniki Universitetin bir müddət kafedra müdiri də olmuşam. Hazırda həmin kafedranın professoru vəzifəsində çalışıram“.

Elmin Nuri