Azərbaycan-Ermənistan təmas xəttində son iki gündür baş verən ağır döyüşlərdə Azərbaycan Silahlı Qüvvələrinin ağır itkilər verməsi ictimaiyyətdə çaşqınlığa səbəb olub. Bu gərginlik hərbi xidmətdə yaş senzinin artırılması məsələni yenidən gündəmə gətirib.

Baş verənləri, ümumiyyətlə, "Yaş məsələsi palamentdə müzakirəyə çıxarılmalıdırmı" sualı ilə ekspertlərin fikrini öyrənmişik. Sualımıza hərbi ekspert Üzeyir Cəfərov və Sumqayıtdan olan siyasi ekspert Elçin Abdullayev cavab verib.

Hərbi ekspert Üzeyir Cəfərov bildirib: "Dəfələrlə təklif irəli sürmüşük ki, güc strukturları qanunvericilik təşəbbüsü ilə Milli Məclisə müraciət etməlidirlər. Bu, cox ciddi məsələdir və buna barmaqarası baxmaq olmaz. Çağırış yaşı mütləq şəkildə 20-yə qaldırılmalıdır. Şükürlər olsun ki, Azərbaycanda demoqrafik problem yaşanmır. Ona görə də, həm çağırış yaşı, həm də evin tək oğulları məsələsi öz həllini tapmalıdır. Dünən cəbhədə şəhid olan qardaşlarılmızdan biri də, ailənin tək oğlu idi. Allah rəhmət eləsin. Amma, bu məsələ gec-tez həllini tapmalıdır. Bunu biz indi etsək, mənə elə gəlir, çox müsbət nəticələrə gətirib çıxaracaq.”

Siyasi ekspert Elçin Abdullayev bu məsələyə başqa prizmadan yanaşıb: "Son günlər cəbhədə baş verən hadisələr hərbi xidmətə çağırışın yaş senzinin artırılmasından daha çox, ordudakı ciddi islahatları zəruri edir. Çünki, istər passiv, istərsə də aktiv müharibə şəraitində intizam qaydalarına ciddi riayət olunmazsa, yaşından asılı olmayaraq itkilərimizin sayı kifayət qədər çox olacaq. Doğrudur, müharibə varsa, orda itki də olmalıdır, ancaq belə bir mühitdə bu qədər itkinin verilməsi qəbuledilməzdir. Hesab edirəm, məsuliyyət daşıyan şəxslər mütləq cəzandırılmalıdırlar ki, növbəti belə hadisələrin qarşısı alınsın. Əks təqdirdə yaş senzinin heç bir rolu olmayacaq.”