Erməni hərbi birləşmələrinin Silahlı Qüvvələrimizin mövqelərini və yaşayış məntəqələrini mütəmadi olaraq atəş altında saxlamasına, eləcə də cəbhə xəttində baş verənlərlə bağlı müxtəlif xəbərlərin yayılmasına baxmayaraq, yerli əhali təsərrüfat işləri ilə məşğuldur.
EL TV bildirir ki, Ağdam sakinləri Yusifcanlı və Bayramlı kəndlərinin ermənilərdən azad edildiyi barədə yayılan xəbərlərin də həqiqəti əks etdirmədiyini bildiriblər.
Gecə saatlarında Yusifcanlıya qonşu olan Hacıməmmədli kəndində əkin sahələrinin suvarılması ilə məşğul olan sakinlər El Televiziyasının əməkdaşı Daşqın Abdullayevə ordumuza arxalandıqlarını və hər şeyin normal olduğunu deyiblər. Hacıməmmədli kənd sakinləri Elmir Bağırov və Faiq Məmmədov bildiriblər ki, əsgərlərimiz düşmənə tutarlı cavablar verirlər. Sakinlər onu da bildiriblər ki, gec-tez bütün torpaqlarımız, o cümlədən də Ağdamın Yusifcanlı və Bayramlı kəndlərinin işğaldan azad olunacağına inanırlar. Lakin hazırkı vəziyyətdə dəqiqləşdirilməmiş məlumatların yayılması düzgün deyil.
Xatırladaq ki, bir sıra saytlarda ermənilərin Ağdamın Yusifcanlı və Bayramlı kəndlərini boşaltdıqları barədə xəbərlər yer alıb. Hətta bəzi müxbirlər sosial şəbəkədə paylaşdığı şəklin Yusifcanlıda çəkildiyini iddia edib. Onu da bildirək ki, hələ bir neçə ildir Yusifcanlı kəndinin kiçik bir hissəsi, 15-20 evin yerləşdiyi ərazi ordumuzun nəzarətindədir. Kəndin əsas böyük hissəsi isə düşmənin tapdağı altındadır.
Təzəkənd kəndində ermənilərlə təmas xəttinə yaxın polis postuna nəzarət edən Tərtər Rayon Polis Şöbəsinin əməkdaşı isə yayılan şayiələrlə bağlı belə deyib:
“Bakıda nə baş verir, bilmirəm, amma bu gün sakitlik olub və atəşkəs pozulmayıb. Bakıda deyirlər ki, guya Yusifcanlı və Bayramlı kəndləri azad olunub. Orada istədikləri məlumatı yayırlar, amma bu düz deyil. Nə biz ora keçmişik, nə də onlar bizə tərəf gəliblər. Yəni deyilənlər düz deyil”.
Xatırladaq ki, bir sıra saytlarda ermənilərin Ağdamın Yusifcanlı və Bayramlı kəndlərini boşaltdıqları barədə xəbərlər yer alıb. Hətta bəzi müxbirlər sosial şəbəkədə paylaşdığı şəklin Yusifcanlıda çəkdiyini iddia ediblər. /milli.az/
Xəbərdən istifadə edərkən istinad etmək vacibdir.
