Ali Baş Komandanın cəbhəyə səfəri, erməniləri qorxuya salan mesajlar

Son günlər cəbhə xəttinə baş verən hadisələrdən sonra prezident İlham Əliyevin Ağdama səfəri ölkə ictimaiyyəti tərəfindən rəğbətlə qarşılandı. Ali Baş komandanın yüksək rütbəli hərbçilərlə keçirdiyi müşavirədə ciddi mesajlar verdi. 

Prezident Azərbaycan Ordusunun Ermənistandan qat-qat üstün olduğunu deyərək Qarabağı azad etmək üçün ordumuzun hər an hazır olduğunu dilə gətirdi.

“Düşmən, erməni işğalçı qüvvələri bir həftə bundan əvvəl qorxaqcasına, namərdcəsinə gecə vaxtı bizim bölgələrimizə hücum etmişlər. Biz itki vermişik, əsgərlərimiz şəhid olmuşlar. Allah bütün şəhidlərə rəhmət eləsin, onların ailələrinə, yaxınlarına səbir versin. Ancaq, eyni zamanda, düşmən layiqli cavab aldı. Həmişə olduğu kimi, erməni tərəfi öz itkilərini gizlədir. Ancaq biz bilirik ki, onlarla işğalçı məhv edilmişdir”-deyə Ali Baş Komandan qeyd edib.

Cəbhədə baş verən olaylara münasibət bildirən prezident düşmənin itkilərini gizlətdiyini diqqətə çatdırıb:

“Bizdə olan məlumata görə, onlarla işğalçı məhv edilib. Ermənilər həmişə olduğu kimi öz itkilərini gizlədirlər. Ancaq həqiqət ondan ibarətdir ki, bu hadisələrdə yenə də Azərbaycan Ordusu üstün olub və bu hadisələrdə biz qələbə qazanmışıq. Bu, həmişə belə olacaq”-deyə Ali Baş Komandan müharibə ehtimalının qaçılmaz olduğunu vurğulayıb.

“Hazırda biz sülh şəraitində yaşamırıq, atəşkəs şəraitində, ancaq müharibə şəraitində yaşayırıq. Bunu hamı bilməlidir. Müharibə bitməyib. Müharibənin birinci mərhələsi başa çatıb. Ancaq ikinci mərhələ də başlana bilər. Heç kim bunu istisna edə bilməz. Biz müharibə istəmirik, biz sülh istəyirik. Ancaq, eyni zamanda, biz torpaqlarımızı istəyirik. Ermənistan, əlbəttə ki, indiki vəziyyəti, status-kvonu saxlamaq istəyir. Vasitəçilərin də əsas istəyi və fəaliyyətinin əsas mahiyyəti ondan ibarətdir ki, müharibə başlamasın. Biz də müharibə istəmirik. Kim istəyər ki? Ancaq biz onlardan fərqli olaraq, torpağımızı istəyirik”.

Tanınmış politoloq Qabil Hüseynli prezident İlham Əliyevin Ağdama səfərini, oradakı çıxışını şəre edib.

AzVision.az-a danışan politoloq hesab edir ki, İlham Əliyevin bölgəyə səfəri sözsüz ki, həm ordunun döyüş əhval-ruhiyyəsini qaldırmaq baxımından, həm də yerli əhalinin baş verən hadisələrə münasibətinin düzgün istiqamətə yönləndirilməsi baxımından xüsusi əhəmiyyətə malik idi.

“Amma ordumuz möhkəm dayandı, düşmənə ağır zərbələr vuraraq onu geri çəkilməyə məcbur etdi. Bununla yanaşı, ermənilərin yeni təxribatları da gözlənilirdi. O cəhətdən, Ali Baş Komandan İlham Əliyevin bölgəyə səfəri sözsüz ki, həm ordunun döyüş əhval-ruhiyyəsini qaldırmaq baxımından, həm də yerli əhalinin baş verən hadisələrə münasibətinin düzgün istiqamətə yönləndirilməsi baxımından xüsusi əhəmiyyətə malik idi. Ali Baş Komandan ordunun yüksək rütbəli zabitləri ilə görüşdü, onlarla operativ vəziyyəti dəyərləndirdi. Fərqlənən zabit və sıravi döyüşçülərə qiymətli hədiyyələr, medallar verdi”.

Ekspertin fikrincə , prezidentin bu səfəri onu göstərdi ki, ölkənin rəhbərliyinin əli ordunun və bölgənin nəbzinin üstündədir:

“Bir sözlə, ordumuz ayaqüstədir. Onun Ali Baş Komandanı, müdafiə naziri və digər yüksək rütbəli zabitlərin bu saat hamısı bölgədədirlər və istənilən anda ölkə rəhbərliyi vəziyyəti tam nəzarət altında saxlamaq üçün lazımı tədbirlər görə bilir. Bu həm əhaliyə, həm də döyüşçülərimizə, zabitlərimizə, ordumuzun bütün şəxsi heyyətinə fədakarlıq, cəsurluq, qormazlıq hissləri aşılayır və qələbəmizin çox da uzaqda olmadığını əyani surətdə göstərir”.

Q.Hüseynlinin sözlərinə görə, prezidentin son çıxışından sonra ermənilər Soçi görüşünün baş tutmasında daha da maraqlıdır. Ekspertin sözlərinə görə, prezident Ağdama səfəri, müşavirədə söylədiyi fikirlər erməniləri qorxuya salıb. 

“Zənnimcə, prezidentin bu səfəri ermənilər üçün də vahiməli bir şərait yaratdı. Çünki, İlham Əliyev məhz təmas xəttindən bəyan etdi ki, biz nəinki, erməniləri 20 faiz ərzimizdən çıxaracağıq, hətta özümüzün tarixi torpaqlarımızı da sahiblənəcəyik. Ermənilər bizim əgər müharibə aparmaq istəyirlərsə, onlar bilməlidirlər ki, bu müharibədə məhv olacaqlar. Bu çox qiymətli, eyni zamanda qətiyyətlə deyilmiş sözlər idi. Ümid edirəm ki, bu sözlərin yanğısı əks təsiri Yerəvanda çox ciddiyətlə qəbul olunubdur. Və ermənilər Əliyev cənablarının çıxışları ətrafında müxtəlif yorumlar yapmaqdadırlar. Azərbaycan ordusunun kifayət qədər yüksək döyüş əhval-ruhiyyəsində olduğunu qeyd edirlər. Bu səbəbdən də onlar hər vəchlə Soçi görüşünün baş tutmasını istəyirlər və Soçi görüşündə Rusiya vasitəsilə Azərbaycanı müəyyən qədər neytrallaşdırmaq istəyirlər”. 

Mirvari Nəcəf