“Siyasilərin elmi fəaliyyəti” rubrikasında Ana Vətən Partiyasının sədri Fəzail Ağamalının elmi fəaliyyətindən danışılacaq. Siyasətə elmi fəaliyyətdən gələn partiya sədri hazırda tarix elmləri doktoru, professordur. 2 monoqrafiyanın və 50-dən çox elmi məqalənin müəllifidir. Naxçıvan şəhərində orta məktəb müəllimi, Naxçıvan Dövlət Universitetinin müəllimi, baş müəllimi işləyib. Azərbaycan Texnologiya İnstitutunda kafedra müdiri kimi çalışan F. Ağamalı İqtisad Universitetində dosent və professor kimi fəaliyyət göstərib.

F. Ağamalının özü də Modern.az-a verdiyi açıqlamasında siyasətə məhz elmdən gəldiyini gizlətmir: “Mən siyasi fəaliyyətə elmi-pedaqoji fəaliyyətdən gəlmişəm. Bakı Dövlət Universitetini 1971-ci ildə bitirdim. O vaxt belə bir qayda var idi ki, universiteti yüksək qiymətlə bitirənlər elmi şuranın qərarı ilə heç nə tələb olunmadan aspiranturaya qəbul oluna bilərdilər. Elmi şuranın qərarına uyğun olaraq, 1973-cü ildə Bakı Dövlət Universitetinin aspiranturasının qiyabi şöbəsinə qəbul oldum. Fəaliyyətimi Naxçıvan Dövlət Pedaqoji İnstitutunda davam etdirdim.

1992-ci ilə qədər birbaşa auditoriyada elmi-pedaqoji fəaliyyətimi davam etdirdim. Bu zaman içərisində Azərbaycan tarixinə aid müxtəlif məqalələr yazdım, həmin dövrdə bir çox ittifaq konfranslarında çıxışlar edirdim. Məqalələrim, tezislərim dərc olunurdu.  

Bundan sonra 1988-ci illərin məlum hadisələri başlayır. Hadisələrdən uzaq durmaq istəməyən F. Ağamalı siyasi proseslərlə əlaqədar paytaxta köçməli olur. Bu onun siyasi fəaliyyətində başlanğıc olsa da, elmi yaradıcılığında çətinliklərə səbəb olur. Belə ki, onu məhz siyasi mövqeyinə görə dərs dediyi universitetdən qovurlar:  

“1988-ci ildə Azərbaycanın ayrılmaz tərkib hissəsi olan Dağlıq Qarabağ və erməni separatist hərəkatının başlanması, Azərbaycanda baş vermiş siyasi proseslərlə əlaqədar olaraq, Gəncədən Bakıya köçdüm. Pedaqoji fəaliyyətimlə bərabər, Azərbaycanda baş vermiş olan xalq hərəkatında iştirak edən fəal üzvlərdən biri oldum. Ona görə də işləmiş olduğum İqtisad Universitetinin müəllimi kimi vəzifədən uzaqlaşdırıldım. İşsiz qaldım. Çünki orada birmənalı şəkildə xalq hərəkatında iştirak edənlərə müsbət münasibət yox idi. Auditoriyada Heydər Əliyevlə bağlı söyləmiş olduğum yüksək fikirlər, onun Azərbaycana vermiş olduğu töhfələrlə bağlı fikirlərimi bildirdim. Bu o dövrdəki rəhbərliyin elə də xoşuna gəlmədi. Ona görə də işdən uzaqlaşdırıldım. 1991-ci ildə Təhsil Nazirliyinin müdaxiləsi nəticəsində başqa ali məktəbdə işlə təmin olundum. 1992-ci ildən isə demək olar ki, auditoriyada dərslərimi keçirdim. Tələbələrlə ünsiyyətdə idim”.  

1992-ci ildə alim tamamilə siyasi arenaya qoşulur və elmdən soyuyur. Bu səbəbdən namizədlik dissertasiyasını da xeyli gec müdafiə edir. Tarixçi alimin namizədlik işi Azərbaycan xanlıqlarının iqtisadi-sosial münasibətləri barəsində olur. Çox keçmədən. Yəni 2005-ci ildə doktorluq dissertasiyasını müdafiə edərək professor vəzifəsinə yüksəlir:

“1992-ci ildən etibarən siyasətlə məşğul olmağa başladım. Elmi-pedaqoji fəaliyyətimdə əvvəlki aktivlik artıq görünmədi. Elmi iş sərbəst vaxt tələb edir. Bu elə bir peşədir ki , digər peşələrlə vəhdəti demək olar ki, çətin alınır. Ona görə də fəaliyyətimdə bir az fasilə yarandı. Keçən əsrin axırlarından başlayaraq, yenidən vaxtilə universitetdə dərs dediyim vaxtda götürdüyüm mövzu üzərində tamamlama işləri apardım və beləliklə, “XIX  əsrin əvvəllərində xanlıqların sosial-iqtisadi münasibətləri”  mövzusunda doktorluq dissertasiya işimi başa çatdırdım. Kitab dərc etdirdim. 2005-ci ildə doktorluq dissertasiyamı müdafiə etdim və 2006-cı ildə professor adını aldım. Keçən əsrin axırlarından başlayaraq, siyasi xarakterli yazılarım daha çox üstünlük təşkil etdi. Bununla bağlı 1999-cu ildə prezidentimiz İlham Əliyevlə bağlı “İlham Əliyev böyük siyasətdə riyazi perspektivlər” adlı fəaliyyətini əks etdirən kitab dərc etdirdim. 2012-ci ilə qədər onun fəaliyyəti ilə bağlı redaktorluğum altında 12 cildlik kitab dərc olundu. Gözümdə problemlər yarandığı üçün 1 il öncə əməliyyat olundum və işləyə bilmədim. Artıq o problem də yavaş-yavaş aradan qalxır”.  (modern.az)