Hər dəfə seçim anı gələndə təhlükə də yaxınlaşır”.

Azərbaycanın tanınmış politoloqu Vəfa Quluzadə Gürcüstan, Türkiyə və Azərbaycanın müdafiə nazirlərinin Naxçıvan görüşü, NATO-nun Əfqanıstandakı yüklərinin Azərbaycandan keçən tranzit yolla daşınması, NATO-nun regionda möhkəmlənmək siyasəti və Rusiyanın buna münasibətinin ölkəmiz üçün nə vəd etməsi barədə sualları cavablandırıb.

Politoloq Azərbaycanı gərgin sınaq gözlədiyini və ölkəmizin qərb seçimi edəcəyini bildirib:

“Rusiyanın Ukraynaya hücumuna qədər Qərb sanki eyforiyada idi. Çünki, əsas rəqib hesab edilən SSRİ çökdü və kommunust ideologiyası dağıdıldı. Ona görə də qərb özünü çox rahat hiss edirdi və Rusiyadan təhlükə gözləmirdi. Hətta Abxaziya və Osetiya işğal ediləndə də Qərb oyanmadı. Ancaq, Rusiya Ukraynaya hücum edəndən sonra qərb anladı ki, həqiqətən də Rusiya SSRİ-ni bərpa etmək istəyir və dünya üçün təhlükəyə çevrilir. İndi qərb qarşısındakı düşməni görür və mübarizəni gücləndirəcək”.

Ekspert onu da əlavə etdi ki, Azərbaycan bu prosesdə düzgün qərar verməli, qərb isə Azərbaycanı real təhlükədən qorumaldır:

“ABŞ dünyanın ən güclü ölkəsidir və bir qayda olaraq potensialının hamısından istifadə etmir. Həlledici məqamda isə, tam gücünü qoyur. İndi bu nəhəng oyanıb və NATO-da bu nəhəngin bir hissəsidir. Azərbaycan balans siyasəti dövründə özünü daha konfortlu hiss edirdi. İndi isə vəziyyət dəyişib və seçim qarşısındayıq.

Hər dəfə seçim anı gələndə təhlükə də yaxınlaşır. İstənilən halda Azərbaycan qərb seçimi etməlidir. Qərb isə Azərbaycanı Rusiya təhlükəsindən qorumalıdır. Rusiyada keçirilən Xəzəryanı dövlətlərin sammitində də Rusiya tələb edəcək ki, Xəzərin səthi ümumi olsun və sərhəd olmasın. Çünki, belə olduqda Rusiyanın hərbi donanması istənilən kimi hərəkət edir. Qarşıda gərgin döyüş var və ümid edirəm ki, Azərbaycan bu döyüşdən salamat çıxacaq”.(azadliq.org)