Rusiyanın Xarici İşlər Nazirliyi Dağlıq Qarabağ münaqişəsi ilə bağlı növbəti açıqlama verib.

Modern.az saytı vesti.ru-ya istinadən xəbər verir ki, Rusiya XİN-in rəsmi nümayəndəsi Aleksandr Lukaşeviç bildirib ki, qoşunların təmas xəttində insanların həlak olması məsələsini diqqətlə araşdırmaq lazımdır.

XİN təmsilçisi tərəfləri Rusiya, Azərbaycan Ermənistan prezidentlərinin meyitlərin qaytarılması haqqındakı  2010-cu ilin 27 oktaybr bəyanatına diqqət çəkib.

O bildirib ki, Azərbaycan və Ermənistan ATƏT və Beynəlxalq Qızıl Xaç Komitəsinin yardımı ilə meyitlərin dəyişdirilməsi barəsindəki bu bəyanata əməl etməlidir.  

Qeyd edək ki, avqustun 7-də Tovuzda əsir düşən erməni kəşfiyyat-diversiya qrupunun üzvü Karen Petrosyan sabahısı gün əsir saxlanıldığı yerdə ürək çatışmazlığından ölüb.  

Bundan əvvəl isə Kəlbəcərdə erməni silahlı yaraqlıları Dilqəm Əsgərov və Şahbaz Quliyevi girov götürüb. Onlarla birlikdə Azərbaycan torpaqlarına gedən Cəbrayıl sakini Həsən Həsənov isə erməni hərbçiləri tərəfindən öldürülüb.

Onun Dağlıq Qarabağda basdırıldığı bildirilib.  

Ermənistan tərəfi meyitlərin, girovların Azərbaycandakı  erməni əsirlərlə dəyişdirilməsi tələbini rədd edir. Görünən odur ki, Ermənistan üçün əsirlikdə olan ermənilərin taleyi maraqlı deyil və onlar azərbaycanlı girovların üzərindən özlərinin təxribat hərəkətlərini davam etdirmək niyyətindədirlər.