Sumqayıtdakı yarmarka və bazarlardakı qiymətlərin fərqinin az olmasına səbəb nədir?

Kənd təsərrüfatı məhsullarının qiymətində yay mövsümündən başlayan bahalaşma hələ də davam edir. Hətta meyvə-tərəvəzin bol olduğu payız mövüsmündə qiymətlərin ucuzlaşacağına olan ümidlər də özünü doğrultmadı.

Belə bir vaxtda Sumqayıt bazarlarında qiymətlərin od tutub yanması təbiidir. Bahalaşma Sumqayıt şəhərində çərşənbə və şənbə günləri təşkil edilən kənd təsərrüfatı məhsullarının yarmarkasında da özünü göstərir.

Kənd təsərrüfatı məhsullarının Sumqayıtda satış qiymətinin hansı vəziyyətdə olduğunu araşdırmaq üçün Mərkəzi bazar və yarmarkada reydlər apardıq.

Sumqayıtın Mərkəzi bazarındakı apardığımız reyd zamanı öyrəndik ki:

İkinci çörək sayılan Tovuz kartofu 70-80 qəpik, Gədəbəy kartofu isə 1 manatdır.

Lobya 1 manat 50 qəpik, badımcan 50 qəpik, xiyar 1manat, Zirə pomidorunun qiyməti 3 manat, çuğundur 1 manat 50 qəpik , soğan 50 qəpik, kök 1 manat, farş kələmin 1 kiloqramı isə 80 qəpikdir .

Meyvələrdən üzümün qiyməti 1 manat 50 qəpiklə 2 manat arası, alma 70 qəpik, nar 50 qəpik 1 manat arası, naringi 1 manat 50 qəpik, armud 1 manat 50 qəpik. Qozun 1 kiloqramı 4 manatdır.

Mərkəzi bazarda qiymətlərin, sumqayıtlıların dili ilə desək, belə tüğyan etməsinin səbəbini bazarın meyvə-tərəvəz satıcıları son zamanlar Azərbaycandan Rusiyaya kənd təsərrüfatı məhsullarının idaxal edilməsilə əlaqələndirdilər. Digər tərəfdən Mərkəzi bazarda yer haqqının günlük qiymətinin 16 manat olmasını qiymətlərə təsir edən əsas səbəbələrdən biri kimi göstərənlər də oldu.

Kənd təsərrüfatı məhsullarının yarmarkasında reydimizi çərşənbə günü apardıq. Öyrəndik ki, şənbə günləri müxtəlif bölgələrdən yarmarkaya satmaq üçün kənd zəhmətkeşləri də öz məhsullarını gətirirlər. Çərşənbə günündən fərqli olaraq həmin gün yarmarkada bolluq olsa da, qiymətlərə heç bir təsir göstərmir.

Apardığımız reydlər zamanı yarmarkada 1 manatdan aşağı qiymətə satılan tərəvəz məhsullarının demək olar ki, əksəriyyətinin keyfiyyətsiz və xarab olması ilk baxışdan diqqətimizi cəlb etdi. Çürümüş və qaralmış badımcanın 3 kq-ı 1manata , əzilmiş pomidorun 1 kq isə 60 qəpiyə satılırdı.

Ümumilikdə isə təzə-tər, keyfiyyətli məhsulların satış qiyməti ilə Mərkəzi bazarda satılan məhsulların qiyməti arasında o qədər də böyük fərq olduğunu görmədik.

Yarmarkada kartof 70-80 qəpik, lobya 1 manat, bibər 80 qəpik, xiyar 80 qəpik, pomidor 2 manat, kələm 50 qəpik, çuğundur 80 qəpik, kök 80 qəpik, badımcan 40 qəpik, soğanın 3 kq-ı 1manat idi. İstənilən göyərtinin bir dəstəsi 10 qəpik, yalnız tərxunun bir dəstəsi isə 80 qəpiyə satılırdı.

Meyvələrə gəlincə nar 50 qəpik, heyva 50 qəpik, feyxoa 1 manat, karalyok 50 qəpik, üzüm 1 manat 50 qəpik, armud 1manat, alma 50 qəpik, naringi 1 manat 50 qəpik. Qozun kiloqramı Mərkəzi bazarda olduğu kimi 4 manat idi.

Meyvə satıcılarından biri qeydləri nə üçün apardığımızı anlayınca armudun qiymətinin 50 qəpik olduğunu, yanlışlıqla 1 manat söylədiyini bildirdi.

Apardığımız müşahidələrdən bu qənaətə gəldik ki, kənd təsərrüfatı məhsullarının satıldığı yarmarkada qiymətlərə doğru–dürüst nəzarət edilmir.

Kənd təsərrüfatı nazirliyi isə belə hesab edir ki, yarmarkalar təkcə həftə sonları deyil, həftənin bütün günləri təşkil edilməlidir. Belə olarsa, qiymətlər tənzimlənər və süni bahalaşmanın qarşısını almaq mümkün olar.

Aytən Əli
Xeberle.com