Modern.az saytı“Siyasilərin elmi fəaliyyəti” rubrikasında Müsavat Partiyasının Divan üzvi, BDU-nun filologiya fakültəsinin dosenti Nüşabə Sadıqlının elmi fəaliyyətindən danışacaq.

O, 32 ildir ki, Bakı Dövlət Universitetində çalışır. Tədris sahəsi isə dünya ölkələri ədəbiyyatıdır. Filologiya fakültəsi “Xarici ölkələr ədəbiyyatı” kafedrasının dosenti olan N.Sadıqlı hazırda doktorluq işini tamamlasa da, hələ ki, onu müdafiə etməyib:

“1972-ci ildə Bakı Dövlət Universitetini bitirdiyim gündən bu vaxta qədər elə həmin universitetdə işləyirəm. Həm də BDU-nun “Slavyan xalqları ədəbiyyatı üzrə” aspiranturasını bitirmişəm. Namizədlik dissertasiyam “Azərbaycan-Bolqarıstan ədəbi əlaqələri” olub. Bakı Dövlət Universitetimdə olan fəaliyyətimlə bərabər, eyni zamanda bir çox ali məktəblərdə dərs demişəm. Qızlar Universiteti, Qafqaz Universiteti, Təfəkkür Universiteti kimi ali məktəblərdə 2-3 illik fəaliyyətim olub. Bolqarıstan, Rumıniya, Türkiyə və bir çox ölkələrdə müxtəlif mövzularla əlaqədar elmi konfranslarda iştirak etmişəm. Bolqarıstan ədəbiyyatının inkişaf mərhələləri ilə bağlı dərs vəsaitləri var. Eyni zamanda müxtəlif mövzulu 50-yə qədər elmi məqalələrin müəllifiyəm. Burada həm Avropa, həm bolqar, fransız ədəbiyyatı haqqında müxtəlif məlumatları mətbuat vasitəsilə işıqlandırmışam. Doktorluq mövzum “Balkar türklərinin ədəbiyyatı” ilə bağlıdır. Doktorluq dissertasiyam da hazırdır. Ancaq bir az müdafiəsində əngəllər var. Orta əsrlər Avropa ədəbiyyatı, XVII əsr Avropa ədəbiyyatı haqqında tədris proqramı yazmışam. Eyni zamanda “Bolqarıstan ədəbiyyatının inkişaf mərhələləri ” adlı dərs vəsaiti hazırlamışam.”

Nüşabə xanım etiraf edir ki, siyasi fəaliyyəti onun elmi fəaliyyətinə kifayət qədər əngəllər törədib. Əbülfəz Elçibəy zamanında da ictimai sektorun aktiv xanımlarından olan Nüşabə xanım elmi və pedaqoji fəaliyyətində bunun mənfi təsirini görüb:

“Kifayət qədər siyasi fəaliyyətim elmi fəaliyyətimə mane olur. Həm vaxt baxımından, həm də gəlin etiraf edək ki, iqtidarda olan siyasətçi olsaydım, çox maneələrə rast gəlməzdim. Ancaq təbiidir ki, müxalifətdə olan siyasətçi kimi elmi işlərdə də maneələr olur”.

Nüşabə Sadıqlı hələ ki, Müsavat başqanlığı üçün rəsmi namizədliyini irəli sürməyib. Hələ ki, gözləyir. Özünün də dediyinə görə işlər onun dediyi kimi getməsə, ona ehtiyac hiss olunsa, mütləq öz namizədliyini irəli sürəcək. 
Əgər namizədliyini irəli sürüb başqan seçilsə, bu onun elmi fəaliyyətinə necə təsir edər? Nüşabə Sadıqlı özü bu sualı cavablayır:

“Hələ ki, Müsavat başqanı olmaq üçün rəsmi namizədliyimi verməmişəm. Əgər ehtiyac olarsa, düşündüyüm kimi proseslər getməyəcəksə, namizədliyimi verəcəyəm. Elmi fəaliyyətlə yanaşı, tədris prosesi də var ki, o prosesi daha önəmli hesab edirəm. Çünki gənclərlə maraqlanmaq, onlara Avropa mədəniyyətini, ədəbiyyatını sevdirmək çox vacib şərtlərdən biridir. Əli bəy Hüseynzadənin bir fikri var. Deyir ki, mən müasir türk gəncini mənən millətçi, dünyagörüşü etibarilə avropalı görmək istəyirəm. Dünyagörüşünü tələbələrə aşılamaq mənim ən vacib vəzifələrimdən biridir”.

Ulduz İbrahimova
Elmin Nuri