Prezident İlham Əliyev Böyük Britaniya və Şimali İrlandiya Birləşmiş Krallığında işgüzar səfərdədir. Məqsəd NATO-nun sammitində iştirak etməkdir. 

ANS TV-nin məlumatına görə, sammit çərçivəsində ABŞ-ın dövlət katibi Con Kerrinin təşəbbüsü ilə Azərbaycan və Ermənistan prezidentlərinin növbəti danışıqları planlaşdırılıb. Rəsmi Bakı bu görüşün mümkünlüyü barədə hələlik açıqlama verməyib. 

Azərbaycan və Ermənistan prezidentləri təmas xəttində bir neçə gün davam edən, hər iki tərəfdən ciddi itkilərlə müşayiət olunan gərginlikdən sonra avqustun 8-də Rusiya prezidenti Vladimir Putinin vasitəçiliyi ilə Soçidə görüşüblər. Bu dəfəki görüşün də baş tutacağı NATO sammitinə alyansa üzv ölkələrin və tərəfdaş ölkələrin prezidentləri dəvət olunub. Rusiyaya isə dəvət göndərilməyib.

Uelsdə start götürən NATO sammitində dünyanın 60-a yaxın lideri, o cümlədən 4 minə yaxın nümayəndə iştirak edir. Kollektiv təhlükəsizlik mövzusunda keçirilən sammitdə gündəmə bir sıra aktual məsələlər çıxarılacaq. Şimali Atlantika Alyansının dövlətləri Ukraynanın Şərqindəki vəziyyətlə bağlı Avropanın təhlükəyə düşməsindən narahatdır. 

NATO rəhbərliyi Rusiyanı silahlılara dəstək olmaqda ittiham edir. Rusiyanın dəvət edilmədiyi sammitdə Ukraynaya hərbi yardım məsələsinin gündəmə gətiriləcəyi gözlənilir. 

Sammitin diqqətində mərkəzində əsas mövzu həm də İraqda fəaliyyət göstərən terorçu təşkilatla mübarizə məsələsidir. NATO müttəfiqlərinin iştirakı ilə Suriya, İraqda geniş ərazi tutmuş bu silahlı qruplaşmaya qarşı ümumi strategiya yaratmaq niyyətindədir. Sammitdə Koalisiya qoşunlarının Əfqanıstandan çıxarılması məsələsi də müzakirə predmetidir. 

Sammit sentyabrın 5- ə kimi davam edəcək.