Elmi fəaliyyətindən danışacağımız şəxs bu gün Müsavat başqanlığına ən əsas namizəddir. 1996-cı ildən bu yana Azərbaycan Dövlət İqtisadiyyat Universitetində çalışan iqtisadçı alim hazırda bəlkə də siyasi fəaliyyətinin ən pik çağlarını yaşamaqdadır. Beləliklə, Modern. az “Siyasilərin elmi fəaliyyəti” rubrikasında İqtisadi Təhlil Mərkəzinin sədri, Müsavat Partiyasının başqanlığına namizəd Qubad İbadoğlunun elmi fəaliyyətindən danışacaq:

1971-ci ildə Füzuli rayonunda anadan olan Qubad İbad oğlu Bayramov özü də dediyi kimi, şagirdkən elmə marağı ilə seçilib. Bakıdakı fizika-riyaziyyat təmayüllü internat məktəbində oxuduğu vaxt fizika üzrə respublika olimpiadasının qalibi olub: 

“Mənim elmə marağım elə orta məktəbdən yaranmışdı. 1987-ci ildə Bakı şəhərində 2 nömrəli fizika-riyaziyyat təmayüllü internat məktəbi bitirəndə həmin il fizika üzrə respublika olimpiadasının qalibi oldum. Məktəbi bitirdikdən sonra Azərbaycan Dövlət İqtisad Universitetinə daxil oldum və 1992-ci ildə fərqlənmə diplomu ilə bitirdim. Elə həmin ildən məni əyani aspiranturada saxladılar. Aspiranturada 60 nəfər aspirantın qrup nümayəndəsi oldum. Hətta həmin aspirantlar içərisində 62 yaşda olanlar da var idi. O vaxt həm elmi, həm də universitetdə olan fəaliyyətimə görə seçilirdim”.

Qubad İbadoğlu siyasət aləminin tək-tük nümayəndələrindəndir ki, elmi heç vaxt siyasətə qurban verməyib. Mütəxəssisi olduğu iqtisadiyyat sahəsindəki analitik təhlillər, xarici iqtisadi əlaqələrin elmi müstəvidə araşdırılması alimin əsas fəaliyyət sahəsi olub. Belə ki, bu fəaliyyət yönü əksər hallarda onun siyasi aktivliyini də qabaqlayıb: 

“Aspiranturanı bitirən kimi ADİU-da müəllim kimi saxladılar. 1996-cı ildən bu vaxta qədər elə həmin universitetdə müəllim, baş müəllim və dosent vəzifələrində çalışıram. Dövlət İqtisad Universitetində namizədlik dissertasiyasını müdafiə etmişəm. Dissertasiya mövzum “Xarici iqtisadi fəaliyyətin təhlili və uçotu problemləri” idi. Elmi rəhbərim Hüseyn Namazəliyev olub. Onu çox savadlı, səviyyəli alim kimi tanıyıram. Həm də çox tələbkar adam idi”.

Bu gün qloballaşmanın əsas mexanizmlərindən olan beynəlxalq iqtisadi əlaqələr və onların müqayisəli təhlili üçün Q.İbadoğlu dünyanın bir neçə məşhur universitetləri və araşdırma mərkəzlərində “master kurs”ları keçib. Bu barədə Modern.az-a özü məlumat verir:

“1999 - 2000-ci illərdə Varşava İqtisad Məktəbində doktorluq proqramını bitirmişəm. 2004-2005-ci illərdə Budapeştdə Mərkəzi Avropa Universitetində dövlət proqramı ilə məşğul olmuşam. 2008-2009-cu illərdə Amerika Birləşmiş Ştatlarının Şimali Karolina universitetində həm pedaqoji, həm də elmi fəaliyyətlə məşğul olmuşam. 175 adda elmi əsərlərin müəllifiyəm. 50-dən çox kitabım nəşr olunub. 15 kitabım və elmi məqaləm dünyanın 10-dan çox ölkəsində çap olunub. Hazırda İqtisad Universitetində kafedra dosentiyəm. Elmi fəaliyyətimi davam etdirirəm. Eyni zamanda İqtisadi Tədqiqatlar Mərkəzində elmi araşdırmalarımı davam etdirirəm. Mən həmişə elmlə siyasət arasında sərhəd qoymuşam. Bundan sonra da onları bir-birindən ayırıb elmi-pedaqoji fəaliyyətimi davam etdirmək niyyətindəyəm”.

Elmin Nuri