Bu gündən Ukrayna böhranı ilə əlaqədar Rusiyaya qarşı Qərbin yeni sanksiyaları qüvvəyə minir. Avropa Birliyi Rusiya Federasiyasının 3 iri Müdafiə Konserni və 3 Yanacaq - Enerji şirkətinin maliyyələşdirilməsinə qadağa qoyur. Bundan başqa Avropa Birliyi olan hüquq-fiziki şəxlər bundan sonra Rusiya Dövlət Bankına kredit ayıra bilməyəcək.

ANS TV-nin məlumatına görə, Kremldən bildirilir ki, əks-ölçülər qismində Rusiya Avropadan avtomobil və yüngül sənaye məhsullarının idxalına məhdudiyyətlər qəbul edə bilər. Avropa Birliyinin sanksiyalarını şərh edən Rusiya Xarici İşlər Nazirliyinin sözçüsü Aleksandr Lukaşeviç, bunun Rusiya qarşı “tam düşmənçilik xətti” olduğunu və Avropa Birliyinin maraqlarına zidd olduğunu bildirib. Lukaşeviç bir daha rəhbərliyin ismarıcını təkrarlayaraq, dövlətin iqtisadiyyatına ziyan vuran istənilən sanksiya ölçülərinə layiqli cavab verəcəklərini bəyan edib. 

Avropa ilə münasibətlərin pisləşməsi fonunda, Rusiya Asiyadan olan ölkələrlə əməkdaşlığı gücləndirir. Dünən Rusiya lideri Vladimir Putin Düşənbədə Şanxay əməkdaşlıq təşkilatının sammitinə qatılıb. Təşkilata hazırda Rusiya, Çin, Qazaxıstan, Tacikistan, Qırğızıstan və Özbəkistan kimi ölkələr üzvdür. Sammitdən sonra təşkilata sədrlik Rusiyaya təhvil veriləcək. Rusiya Şanxay Əməkdaşlıq Təşkilatına sədrlik etdiyi dönəmdə qurumun genişləndirilməsini planlaşdırır. Artıq Pakistan, Hindistan və İran təşkilatın bərabərhüquqlu üzvlərinə çevrilməyə can atır. 

Sanksiyalar ərəfəsində Rusiya Polşaya qaz təchizatını əhəmiyyətli dərəcədə azaldıb. Polşa Dövlət Neft- Qaz şirkətinə görə, nəql olunan qazın miqdarı gündəlik tələb olunan normadan 45 faiz aşağıdır. Polşa tərəfinə görə “Qazprom” bu addımı ilə əlaqədar şirkətə nə izahat nə də bildiriş göndərib.