2014-cü ilin dekabrında keçiriləcək bələdiyyə seçkilərində siyasi partiyaların namizədləri kimlər olacaq? Bu şəxslər partiyaların rəhbərliyində təmsil olunan adamlar olacaq, yoxsa sıravi üzvlər? 

Modern.az saytı bu sualı bir neçə partiyaya ünvanlayıb.

YAP icra katibinin müavini Siyavuş Novruzov bildirib ki, hazırda hakim partiyada seçkiyə ciddi hazırlıq işləri gedir. Ümumilikdə partiyadan 20 min nəfərin namizədliyi irəli sürüləcək.

Müsavat partiyası başqanın müavini  Gülağa  Aslanlının isə cavabı belə olub:“Başımız qurultaya qarışıb. Bu işi qurtarandan sonra oktyabrın əvvələrində tam dəqiqləşdirəcəyik. Amma bələdiyyə seçkilərinə hazırlıqlar çoxdan başlayıb. Rayon təşkilatlarında göstərişlər verilib ki, rayon təşkilatları öz qüvvələrini hesablasınlar. Müəyyənləşdirsinlər ki, hansı  bələdiyyədə iştirak etmək haqqında qərar veriblərsə, onu indidən bildirsinlər.  Bu haqda hüququ yardım vermək isə, Musavat partiyasının seçki departamentinin üzərinə düşür".  

AMİP sədri Yusif Bağırzadə bildirib ki, partiyanın bu günə qədər təşkil olunan  bələdiyyə seçkilərində xeyli bələdiyyə üzvləri olub. “Bələdiyyə seçkilərdə partiyanın baş katibi Arzuxan Əlizadə başda olmaqla, digər üzvlərimiz aktiv iştirak edəcək. Kifayət qədər uğurlarımızın olacağına əminik”.

Liberal Partiyasının sədri Əvəz Temirxan deyir ki, partiyanın aparıcı şəxslərindən bu il  heç kim bələdiyyə seçkilərinə qatılmayacaq. 
“Ümumiyyətlə, partiya olaraq bu seçkidə iştirak etməyi düşünmürük. Ancaq üzvlərimizə azad seçim verəcəyik. Kim istəsə, seçkilərdə  iştirak edə bilər”.

Böyük Quruluş Partiyasının başqanı Fazil Mustafanın sözlərinə görə, rəhbər şəxslərdən seçki prosesində heç kim iştirak etməyəcək. “Bələdiyyə seçkilərinə partiyanın yalnız yerli kadrları qatılacaq”. 

Ümid Partiyasının sədri İqbal Ağazadə bələdiyyə seçkilərində partiyanın  şöbə rəhbərlərinin və müavinlərin iştirak edəcəyini bildirib.

AXCP sədrinin müavini Razi Nurullayev qeyd edib ki, hələlik bu barədə partiyada müzakirə aparılmayıb. “Seçki prosesinə qatılıb və ya  qatılmayacağımıza dair hazırda bir məlumat yoxdur”.

BAXCP-nin siyasi məsələlər üzrə müavini Niyaməddin Orduxanlı deyir ki, bələdiyyə seçkilərinə ciddi hazırlıq işləri gedir. “Bununla bağlı geniş iş aparılır. Yaxınlarda təşkil olunacaq növbəti Ali Məclis bu məsələyə yönləndiriləcək. Çalışacağıq ki, bütün rayonlar üzrə , bölgələr və şəhər üzrə öz namizədimizlə çıxış edək. Namizədlərimiz  arasında sədr müavinindən tutmuş şöbə sədrlərinin müavinləri, Ali Məclis üzvləri də iştirak edəcək. Ümid edirik ki, bu ilki bələdiyyə seçkilərində 2-ci yeri qazana biləcəyik”.

Ana Vətən Partiyasının sədri Fəzail Ağamalı hazırda partiyada  bələdiyyə seçkiləri ilə bağlı  ciddi hazırlıq işləri getdiyini bildirib. 
“Seçkilərə hazırlıq may-iyun aylarından başlayıb. Həmin aylarda biz yığıncaq keçirdik  və şəhər, rayon təşkilatlarının hər birinə qarşıdan gələn seçkilərdə fəal iştirak etmək tapşırıldı. Həmçinin onlara tapşırıq verildi ki, namizədlərini müəyyənləşdirsinlər. Sentyabrın axırı, oktyabrın əvvəllərində bir daha məclis təşkil olunacaq. Məclisin iclasından sonra, kimlərin iştirak edəcəyi məlum olacaq. Çalışacağıq ki, ötən ilki seçkilərdən daha çox mandatlar əldə edək”.

Vətəndaş Həmrəyliyi Partiyasının sədri Sabir Rüstəmxanlının sözlərinə görə, partiya hazırda seçkilərə  hazırlıq ərəfəsindədir. Hələlik kimlərin iştirak edəcəyi bəlli deyil.

ADP sədri Sərdar Cəlaloğlu isə hazırda partiyalarında bu məslə ilə bağlı dəqiq qərarın olmadığını bildirib.

Məltəm Talıbzadə