Ermənistan-Azərbaycan, Dağlıq Qarabağ münaqişəsinin nizamlanması üzrə ATƏT-in Minsk Qrupunun yeni amerikalı həmsədri Endryu Şofer ilə sıx əməkdaşlığı davam etdirməyə hazırıq.
Bu sözləri Teleqraf.com-a açıqlamasında Azərbaycan Xarici İşlər Nazirliyinin (XİN) mətbuat xidmətinin rəhbəri Hikmət Hacıyev ABŞ-ın yeni daimi həmsədr təyinatına münasibət bildirərkən deyib.
Onun sözlərinə görə, ATƏT-in Minsk Qrupunun həmsədrləri mandatlarına uyğun olaraq Azərbaycanın işğal olunmuş ərazilərindən Ermənistan qoşunlarının çıxarılmasını, Azərbaycanın beynəlxalq səviyyədə tanınmış sərhədləri daxilində ərazi bütövlüyü və suverenliyinin bərpa olunmasını və məcburi köçkünlərin geri qayıtmasını təmin etməlidir: "Lakin bu, Minsk Qrupunun 25 illik fəaliyyəti ərzində təmin edilməyib”.
Hikmət Hacıyev əlavə edib ki, Azərbaycanın Minsk Qrupunun həmsədrlərindən gözləntisi fərdi deyil, institusional xarakter daşıyır.
XİN sözçüsü müvəqqəti həmsədr olmuş Riçard Hoqlandın da fəaliyyətinə toxunub:
"Ona ATƏT-in Minsk Qrupunun ABŞ-dan olan müvəqqəti həmsədri kimi fəaliyyəti və xüsusilə Azərbaycanın ərazi bütövlüyü və suverenliyinin təmin olunması və Azərbaycanın işğal olunmuş ərazilərindən Ermənistan qoşunlarının çıxarılması ilə əlaqədar ABŞ-ın ATƏT-in Minsk Qrupunun həmsədri kimi prinsipial mövqeyini ortaya qoyması baxımından təşəkkür edirik və gələcək fəaliyyətində uğurlar arzulayırıq”.
Qeyd edək ki, Endyu Şofer Birləşmiş Ştatların Vyanada beynəlxalq təşkilatlar yanındakı missiyasında çalışıb. O, avqustun 28-dən etibarən ABŞ-ın ATƏT-in Minsk Qrupunda daimi həmsədri vəzifəsini icra edəcək.
Xəbərdən istifadə edərkən istinad etmək vacibdir.
