Türkiyənin Xarici İşlər Nazirliyi ABŞ-da prezident Ərdoğanın mühafizəçilərinə qarşı cinayət işinin açılmasına görə rəsmi Vaşinqtona etirazını bildirib.
"Anadolu” agentliyinin verdiyi xəbərə görə, nazirliyin bu barədə yaydığı açıqlamada deyilir: "Qərəzli iddianamə və cinayət işinin açılmasına qəti şəkildə etiraz edirik”.
Bəyanatda qeyd olunub ki, Türkiyə nümayəndə heyətinin təhlükəsizliyi təmin olunmadığı halda, PKK tərəfdarları aksiya adı altında təxribatlara əl atıblar. Və bu barədə ABŞ-ın müvafiq qurumlarına dəfələrlə məlumat verilib.
Xatırladaq ki, ötən gün rəsmi Vaşinqton ABŞ-da etirazçılara hücum etdiklərinə görə Türkiyə prezidenti Rəcəb Tayyip Ərdoğanın mühafizəçilərinə qarşı ittiham irəli sürüb. Etirazçılarla mühafizəçilər arasında qarşıdurma R.T.Ərdoğanın mayda Vaşinqtona səfəri zamanı, Türkiyə səfirinin iqamətgahı qarşısında baş verib. Məlumata görə, ittiham ümumilikdə 19 nəfərə qarşı irəli sürülüb. Onlardan 15 nəfəri Türkiyə təhlükəsizlik xidmətlərinin əməkdaşlarıdır.

Xəbərdən istifadə edərkən istinad etmək vacibdir.