Avronest Parlament Assamleyasının sentyabrın 22-də Bakıda iclası keçiriləcək. Tədbirində Avropa Parlamentinin və "Avronest" Parlament Assamleyasına üzv ölkələrinin deputatları, BMT-nin nümayəndələri, Əhali və İnkişaf üzrə Avropanın Parlament Forumunun Parlamentlərarası İttifaqın təmsilçiləri və beynəlxalq ekspertlər iştirak edəcəklər.
Avronest Parlament Assamleyasının Bakıda keçiriləcək tədbirində erməni deputatların da iştirak edəcəyi gözlənilir. Amma bu, hələ ki tam dəqiq deyil…
Məsələ ilə bağlı Milli Məclisin mətbuat xidmətinin rəhbəri Akif Təvəkküloğlu Modern.az-a açıqlama verib.
Qurum rəsmisi bildirib ki, Avronest Parlament Assambeleyasına üzv ölkə olaraq Ermənistandan olan deputatların da tədbirdə iştirakı mümkündür.
"Amma bu tədbirdə onların iştirak edib-etməyəcəyi özlərindən asılıdır. Müraciət edəcəklərsə, müraciətlərinə baxılacaq. Hazırda isə onlardan iclasda iştirak edib-etməyəcəkləri ilə bağlı heç bir müraciət daxil olmayıb”.
Qeyd edək ki, bir neçə gün bundan əvvəl erməni mətbuatı Ermənistanın Avronest PA-dakı nümayəndə heyətinin rəhbəri Armen Aşotyan və heyətin üzvü Mane Tandilyanın Bakıda keçiriləcək iclasda iştirak edəcəyini yazmışdı.
Xəbərdən istifadə edərkən istinad etmək vacibdir.
