Ukrayna qəbul etdiyi yeni təhsil qanunu ilə özünə Macarıstan və Rumıniya ilə problemlər yaratdı.
Bu sözləri Gürcüstanın eks-prezidenti və Odessa vilayətinin sabiq qubernatoru Mixail Saakaşvili şəxsi Feysbuk hesabında yazıb:
"Rus məktəbləri ilə bağlı məsələni həll etmək istəyirdilər, ancaq yaxın tərəfdaşları ilə konflikt qazandılar. Axı hər şeyi düzgün edib, konfliktdən qaça bilərdilər”.
Saakaşvili təhsil qanununa qarşı olduğunu bildirib və alternativ variantlar təklif edib:
"İslahatlara qədər Gürcüstanda məktəblərin 20 faizi rus, Azərbaycan və erməni dilində idi. Biz birinci mərhələdə bu məktəblərdə multi linqvistik təhsili tətbiq etdik. Yəni dərslərin 30 faizi rus, 70 faizi gürcü dilində keçirilir. YUNİSEF və Avropa Birliyi bu islahatı dəstəklədi. Bütün müəllim və şagirdlər hazır olduqda isə dərsləri gürcü dilində keçməyə başladıq. Bununla paralel olaraq, biz məktəblərin akkreditasiyasında ədalətli mexanizm yaratdıq. Nəticədə Azərbaycan və Ermənistanla anlaşılmazlıqdan qaçdıq, gürcü dilinin öyrənilməsi səviyyəsini maksimuma çatdırdıq”.
Qeyd edək ki, Ukrayna Prezidenti Petro Poroşenkonun imzaladığı yeni qanuna əsasən, ölkədə yaşayan azsaylı xalqlar məktəblərdə öz dilləri ilə yanaşı Ukrayna dilini məcbur öyrənməlidir.(Teleqraf.com)

Xəbərdən istifadə edərkən istinad etmək vacibdir.