Tarix boyu Atatürk daxil olmaqla Türkiyənin bütün dövlət başçılarının əsas planlarından biri İraqın Mosul və Kərkük ərazilərini Türkiyə ərazisinə qatmaq olmuşdur. Bərzaninin Kərkükdə referendum keçirməsindən sonra isə Rəcəb Tayyib Ərdoğan İraq kürdlərinə bir neçə dəfə xəbərdarlıq etmişdi.
Xeberle.com-a açıqlama verən politoloq Qabil Hüseynli qeyd etdi ki, sözügedən məsələ ilə bağlı Türkiyə tarix boyu müxtəlif müqavilələrə imza atıb.
"Türkiyənin Böyük Britaniya ilə 1926-cı ildə imzalanmış sülh sazişinə görə İraqın ərazisində hər hansı bir dövlət yaranarsa, onda Türkiyə Mosul və Kərkük vilayətlərini öz ərazisinə qata bilərdi. 1936-cı ildə bağlanan Modrus sülh müqaviləsində də bu məsələ təkrar edilmişdi. Ancaq, həmin sülhlərdə kürd dövlətləri bu məsələyə həvəskar deyildilər.
Türkiyənin mərhum prezidenti Turqut Özal Kərkük və Mosulun birləşdirilməsi üçün bir sıra tədbir hazırlamışdı. Ancaq, o dövrdə baş nazir olan Süleyman Dəmirəl bunun əleyhinə çıxır. Türkiyədə isə belə bir qayda var ki, qoşunların xaricdə hərbi əməliyyatı üçün mütləq parlament razılıq verməlidir. Süleyman Dəmirəlin "Doğru Yol" partiyası parlamentdə səs çoxluğu təşkil etdiyindən bu məsələnin baş tutmayacağını görən ölkə prezidenti bu fikirdən imtina etmişdir.
İndi isə bu məsələ daha mürəkkəbdir. Söhbət İraqın ərazi bütövlüyündən gedir. Sadəcə olaraq orada İraq kürdlərin yeni dövlət yaratmasına qarşı çıxmalıdır. Zənnimcə, bunun üçün nə lazımdırsa ediləcək".
Hicranə İsmayılova
Xeberle.com

Xəbərdən istifadə edərkən istinad etmək vacibdir.