Quberniyaların yaradılması bizə nə verə bilər?
Milli Məclisin Regional məsələlər komitəsinin üzvü Tahir Rzayev Modern.az-a açıqlamasında deyib ki, quberniyanın yaradılması idarəetmə sistemindən asılıdır
"Tari.xən ayrı-ayrı ölkələrin timsalında quberniyalara rast gəlinib. İcra strukturlarında dəyişiklik olarsa, quberniyalar yaradıla bilər. Çünki Azərbaycanda quberniyaların yaradılması idarəetmə sistemindən asılıdır.
 
Azərbaycan müstəqil,  konstitusion ölkədir. Əgər gələcəkdə idarəetmə strukturunda mühüm dəyişikliklər olarsa, birləşmələr effektiv nəticə verərsə, rayonların birləşməsi zamanı quberniya, ya da mahal yaradılması dövlət tərəfindən dəstəklənərsə, səmərəli işə getmək olar”.
Deputat deyir ki, əslində, quberniyaların yaradılması ideyası çox yaxşı haldır.
"Cənab prezident həmişə  çıxışlarında deyir ki, regionlarda inkişaf getməlidir, insanlara daha yaxın olmaq lazımdır, kəndlər, şəhərlər, qəsəbələr inkişaf etməlidir. Əgər yerlərdə inkişaf gedirsə, birləşmələrə ehtiyac yoxdur. Bunun effektivliyi əsasdır. Məsələn, bələdiyyələr yarananda bəlli oldu ki, bu qədər sayda bələdiyyələrin mövcudluğu səmərə vermir.
 
Ona görə də 1100-ə yaxın bələdiyyə birləşdi. Bu da səmərəsini verdi. Çünki kiçik bələdiyyə iş icra edə bilmirdi. Bu gün bəzi rayonlar iqtisadi gücünü qura bilmirsə, gəlir gətirə bilmirsə, gələcəkdə onların   böyük rayonla birləşməsi zərurətə çevriləcək. Çünki respublikada kiçik rayonlar var”.
T. Rzayev quberniyaların yaradılmasından danışarkən bildirib ki, elmi əsaslandırmanın zəruriliyi nəzərə alınmalıdır.
"İndiki halda, quberniyaların  səmərəsini düşünmək lazımdır. Birdən-birə deyək ki, Rusiyada quberniyalar mövcuddur biz də buna gedək, bu düz olmaz. Buna gözübağlı getmək xaos yarada, insanları narazı sala bilər.
Ona görə də öncə işin iqtisadi tərəflərini düşünmək lazımdır. O zaman quberniyaların yaradılmasına getmək olar. Əsas məsələ bunun xalq tərəfindən dəstək ala bilməsi və gələcək fəaliyyətinin necə qurulmasıdır. Çünki quberniyaların nə verə bilməsi elmi cəhətdən əsaslandırılmalıdır. Əgər əsaslandırılsa bu yaxşı olar”.   

Xəbərdən istifadə edərkən istinad etmək vacibdir.