İqor Mosiyçuka qarşı sui-qəsdin törədilməsində Çeçenistanın rəhbəri Ramzan Kadırov maraqlıdır.
Bunu jurnalistlərə açıqlamasında Ukrayna Daxili İşlər nazirinin müşaviri İvan Varçenko söyləyib.
"Kadırovun bu sui-qəsddə marağı ola bilər. Ona görə ki, məhz Kadırov 2014-cü ildə Mosiyçuku ölümlə hədələmişdi. Variantlar çoxdur, amma əsas olan odur ki, sifarişçi Rusiyadır” – deyə o bildirib.
Ukraynanın Radikal Partiyasından olan deputat Dmitri Linko da bundan öncə teraktın kadırovun sifarişi ilə gerçəkləşdiyinə şübhə etmədiyini açıqlamışdı.
Qeyd edək ki, 2014-cü ildə Mosiyçuk "Qafqaz İmarəti” terror təşkilatına dəstək verərək, onların Rusiyaya qarşı ikinci cəbhə açdıqlarını bildirmişdi. Bundan sonra Mosiyçuk video paylaşaraq "Yaşasın azad İçkeriya” ifadələrini işlətmişdi və Kadırovun fotosuna atəş açmışdı. Kadırov isə öz növbəsində Mosiyçuku ölümlə hədələmişdi. Bununla bərabər ukraynalı deputata qarşı cinayət işi qaldırılmış və onun ölkəyə gətirilməsi istənilmişdi.

Xəbərdən istifadə edərkən istinad etmək vacibdir.