Məlumdur ki, dünən axşam yerli vaxt ilə saat 18:30 radələrində Kiyev aeroportunda Mixail Saakaşvilinin 11 yaşlı oğlu saxlanılıb. Bu barədə Saakaşvili özünün "Facebook” hesabından yazaraq məlumat verib. Keçmiş Odessa meri bildirib ki, Gürcüstan Təhlükəsizlik Xidmətinin əməkdaşı Borispol Hava Limanında onun oğlu ilə bərabər saxlanılıb. Ukrayna Dövlət Sərhəd Xidmətindən verilən məlumatda isə azyaşlının saxlanılmasına səbəb kimi onu qarşılamağa heç bir səlahiyyətli şəxsin gəlmədiyi göstərilib və bildirlib ki, təxminən 20:00 radələrində vətəndaşın atası gəldikdən sonra sərhəd xidmətinin əməkdaşları sənəd yoxlanışı həyata keçiriblər və ata ilə oğulun görüşdüyünə əmin olublar.

Bəs görəsən,Ukrayna prezidenti Pyotr Poroşenko bununla M.Saakaşviliyə gözdağımı verir?

Politoloq Elxan Şahinoğlu bunun eks gürcü prezidentinə ciddi bir mesaj ola biləcəyini vurğulayıb: "Ümumiyyətlə M.Saakaşvilinin Ukraynada qalması getdikcə çətinləşir. Bütün hallarda Ukrayna hakimiyyəti çalışacaq ki, eks gürcü prezidenti və onun ailəsi ya xoşluqla ölkəni tərk etsin, ya da deportasiya olunsun. Çünki hazırda M.Saakaşvili Kiyevin mərkəzində müddətsiz mitinqlər keçirir. Keçmiş Odessa merinin Ukraynada çox güclü reytinqi olmasa da, müxalifətin maraqlarına xidmət edir və P.Poroşenkoya müxalif olan qüvvələri gücləndirir. Aydındır ki, bu da hakimiyyəti ciddi narahat edir. Ona görə də düşünürəm ki, hakimiyyət hansısa bir mərhələdə eks gürcü prezidentini ölkədən çıxarmağa çalışacaq və hansısa neytral Avropa ölkəsinə göndərəcək. Bunun sonu M.Saakaşvili üçün yaxşı nəticələnməyəcək. Çünki keçmiş Odessa merinin Ukraynada prezident seçilmək şansı yoxdur. Ukraynalılar başqa ölkədən olan namizədi prezident seçməyəcəklər. M.Saakaşvilinin indiki fəaliyyəti hakimiyyətin əleyhinə, Rusiyanın isə xeyrinədir. Ona görə ki, Rusiyanın, Yuliya Timoşenkonun əsas məqsədi P.Poreşenkonun hakimiyyətini zəiflətməkdir. Keçmiş Odessa meri də o siyasətə qulluq edir. Buna görə də Ukrayna hakimiyyətə hazırda M. Saakaşvilini ölkədən çıxarmaq üçün müxtəlif planlar qurur. Hesab edirəm ki, oğlunun hava limanında saxlanılması da deyildiyi kimi, "onu qarşılayan səlahiyyətli şəxs yox idi” yanaşması ilə bağlı deyil. Ola bilsin ki, bu da M.Saakaşviliyə ciddi bir mesajdır. P.Poroşenko ona ölkəni tərk etməsi üçün xəbərdarlıq edir və bildirmək istəyir ki: "ölkəni tərk et, yoxsa sənə qarşı daha ciddi addımlar ata bilərik”.

Elnarə Salamova

Xeberle.com

Siyasət bölməsi