Ermənistan Prezidenti Serj Sərkisyanın Avropa Birliyi ilə imzaladığı müqavilə əhalinin gözünə kül üfürmək xarakteri daşıyır. Bütövlükdə bu müqavilənin tam həcmdə işləyəcəyini və Ermənistana xeyir gətirə biləcəyini söyləmək çox çətindir.
Bu sözləri Axar.az-a politoloq Qabil Hüseynli Ermənistanın Avrasiya İttifaqından çıxması ilə bağlı məsələləri şərh edərkən söyləyib. O bildirib ki, hazırkı situasiyada bu, real görünmür:
"Əgər Ermənistan Avropa Birliyi ilə assosiativ üzvlüyə gedərsə, o zaman onun qarşısında Avrasiya İttifaqından ayrılmaq məsələsi qoyula bilər. Çünki assosiativ üzvlük Avropa Birliyinə gedən yolda önəmli addımlardan biridir və Avropa Birliyinə assosiativ üzv olanda başqa birliklərə üzv olmaq mümkün deyil. Avropa Birliyi və Ermənistan arasında imzalanan ikitərəfli sənəd ticarət, iqtisadi və mədəni əlaqələri nizama sala bilmək üçün o qədər də yüksək qiymətləndiriləcək sənəd deyil. Ermənilər bundan istifadə edib Avropa Birliyi içərisindəki erməni və yaxud da Ermənistana müəyyən qədər rəğbət göstərən iş adamlarından həm maliyyə yardımı, həm də digər sahələrdə dəstək almaq fikrindədir. Bundan başqa, sözsüz ki, Ermənistan bu sənədlə Avropa Birliyindən alacağı mallara gömrük rüsumunun azaldılması məqsədlərini də hədəfləyir. Beləliklə, Ermənistan rəhbərliyi son dərəcə çıxılmaz vəziyyətə düşmüş iqtisadiyyatını, xüsusilə də əhalinin maddi vəziyyətini dilənçilik yolu ilə düzəltməyə çalışır. Bunun həyata keçib-keçməyəcəyi isə hələ müəmmalıdır. Çünki hələ qarşıda AB tərəfindən Ermənistana olan etimadsızlığın aradan götürülməsi məsələsi durur. Çünki AB-də də, ABŞ-da da yaxşı başa düşülür ki, postsovet məkanında Rusiyaya ən sadiq və Rusiyanın ən çox hərbi bazalarının yerləşdiyi ölkə Ermənistandır. Eyni zamanda, Ermənistan-Rusiya birliyi postsovet məkanındakı ölkələr üçün ciddi təhlükə mənbəyidir. Postsovet məkanındakı ölkələri Rusiya təhdid altında saxlamaqla, onların AB-yə yaxınlaşmasını mümkün olduğu qədər qarşısını almağa çalışır və müəyən qədər də buna nail olur”.
Politoloq qeyd edib ki, "Ermənistan ikitərəfli müqavilə imzaladı və hər şey düzəldi” qənaətinə gəlmək qətiyyən doğru deyil:
"Çünki Ermənistan Putinin və Rusiyanın nəzarəti altında olan qurumlara - Avrasiya İqtisadi Birliyinə, KTMT-yə və Gömrük İttiqfaqına üzvdür. AB-dən ona bəslənilən etimad lazımi səviyyədə olmayacaq. Ermənistan Avropa Birliyi ilə normal, qarşılıqlı etimada əsaslanan əlaqələr qurmaq üçün ilk növbədə Rusiya ilə məsafə saxlamalı, öz ərazisindəki rus hərbi bazalarını çıxartmalı, Putinin rəhbərlik etdiyi qurumlardan uzaqlaşmalıdır. Çünki həmin hərbi bazalar NATO-ya, AB-yə qarşı çevrilib. Yalnız bundan sonra Avropa Ermənistanla tamhəcmli və ikitərəfli faydalıllığa əsaslanan münasibətlər qura bilər. Amma Ermənistanın buna imkanı yoxdur. Çünki Ermənistan hazırda Rusiyanın quberniyası kimi idarə edilir və Rusiyadan iznsiz hər hansı addımı atmaq imkanı da yox səviyyəsindədir. Ermənistan Rusiyanın forpostudur, forpostu olaraq da qalacaq. O forpostluq kimi təhqiredici mövqedən uzaqlaşmaq üçün lazım olan imkanlara malik deyil”.
Qeyd edək ki, Ermənistan-Avropa Birliyi arasında imzalanan razılaşmadan sonra İrəvanda Ermənistanın Avrasiya İttifaqından çıxması ilə bağlı parlament dinləmələri aparılır.

Xəbərdən istifadə edərkən istinad etmək vacibdir.