Rusiya prezidentinin Azərbaycana kimi səfir təyin edəcəyini yalnız bu prosesin içərisində olan görəvlilər deyə bilər.
Bu sözləri açıqlamasında analitik Elçin Mirzəbəyli deyib. Analitik Rusiyanın təyinat zamanı Azərbaycanın mövqeyinin nəzərə alacağını vurğulayıb:
"Bu, dövlətlərlərarası münasibətlərin formalaşdığı gündən bəri tətbiq olunan diplomatik prosedurdur. Bu baxımdan Rusiya prezidentinin Azərbaycana kimi səfir təyin edəcəyini yalnız bu prosesin içərisində olan görəvlilər deyə bilər. Georgi Zuyevin təyinatına Azərbaycanın münasibəti ilə bağlı məsələyə gəldikdə, bu və ya digər şəxsin səfir təyin olunmasına razılıq verməmək Azərbaycanın hüququdur. Doroxin məsələsində söhbət heç də onun vaxtından öncə geri çağırılmasından getmir. "Rusiya Federasiyasının xarici dövlətdəki Fövqəladə və Səlahiyyətli Səfiri və Rusiya Federasiyasının beynəlxalq təşkilatdakı təmsilçisi haqqında” 23 iyun 2016-cı ildə qəbul edilmiş qanunda səfir vəzifəsinin icrası ilə bağlı vaxt məhdudiyyəti nəzərdə tutulmayıb. Doroxin isə 9 ildir Rusiyanın Azərbaycandakı diplomatik missiyasına rəhbərlik edir. Bu, kifayət qədər böyük bir zaman kəsiyidir. Əgər Doroxin xidmətə başladıqdan hətta 2 il sonra geri çağırılsaydı, bu faktın özü də hüquqi baxımdan onunla bağlı hər hansı bir problemin olduğu anlamına gəlməyəcəkdi. Siyasi motivlər isə ola da bilər, olmaya da...”
Qeyd edək ki, noyabrın 27-də Rusiya Prezidenti Vladimir Putin ölkəsinin Azərbaycandakı fövqəladə və səlahiyyətli səfiri Vladimir Doroxini geri çağırıb. Onun yerinə Rusiya Xarici İşlər Nazirliyinin Kadrlar Departamentinin direktorunun müavini Georgi Zuyevin təyin olunacağı ilə bağlı yayılan xəbər isə Moskvadan təkziblənib.(Axar.az)

Xəbərdən istifadə edərkən istinad etmək vacibdir.