Bir neçə gün öncə Amerika prezidenti Donald Tramp Türkiyə prezidenti R.T.Ərdoğanla telefon danışığında qeyd etmişdi ki, ölkəsi YPG-yə bir daha silah verməyəcək. Pentaqonun yaydığı məlumatda isə Amerikanın YPG ilə əməkdaşlığa davam edəcəyi bildirilib. Maraqlıdır, Amerika Türkiyə ilə oynayır? Və yaxud Amerika üçün YPG Türkiyədən daha etibarlı müttəfiqdir?

Politoloq Fərhad Mehdiyev qeyd edib ki, Amerika üçün YPG daha önəmli deyil. Ancaq Amerikanın təməli qoyulmuş kürd siyasəti var.

"Amerika əlbəttə ki, kürdləri dəstəkləməyə davam edəcək. Türkiyə isə bunun qarşısını almaq üçün heç nə edə bilməz. Ona görə də Türkiyə ancaq özü aktiv addımlar atmalıdır. Bundan başqa gərək Türkiyə İŞİD məsələsini kökündən həll etsin ki, Amerikanın bəhanəsi olmasın. Digər tərəfdən Türkiyə Rusiyadan S-400 aldı. Və Amerikanın da YPG-yə silah satmasında da bunu görmək olar. Ola bilər ki, Amerika Türkiyəyə göz dağı verir ki, sən gedib başqasından silah alsan, mən də sənin potensial düşmənlərinə bu cür kömək edə bilərəm. Söhbət ondan gedir ki, Türkiyənin Amerikanın kürdləri dəstəkləməməsi üçün sahib olduğu vasitələr olduqca məhduddur. Bunun ən güclü vasitəsi odur ki, Türkiyə desin ki, sən YPG-yə silah satırsansa mən səndən silah almayacam. Amma Türkiyə Amerikadan silah almasa kimdən alacaq, Rusiyadan? Rusiyadan bəzi silahları almaq mümkündür ancaq hər sahədə yüksək texnologiyaı silahları mövcud deyil. Türkiyə isə hələ ki, öz silahlarını istehsal edə bilmir”.

F.Mehdiyev bundan başqa qeyd etdi ki, bu proseslər Yaxın Şərqdə geosiyasi oyundur. Türkiyə isə istəməsə belə bu oyunun aktyorudur. Nə qədər bacarıb bacarmaması isə ayrı məsələdir”.

Şərqşünas-politoloq Vüsal Hətəmov isə düşünür ki, Türkiyə dövləti Qərb tərəfindən həmişə xəyanətlə üzləşib:

"Avropa Birliyinə üzvlük məsələsindən tutmuş, Mavi Mərmərə mövzusuna qədər. Hələ bura Yunanıstan-Türkiyə, Almaniya-Türkiyə, Niderland-Türkiyə məsələlərini də əlavə etmək olar. Bunu necə başa düşmək olar ki, əvvəlcə R.T. Ərdoğan bütün dünyaya bildirdi ki, D.Tramp onunla danışıq zamanı PKK-nın qolu olan təşkilata silah verməyəcəyini deyib. Səhərisi gün isə Pentaqon bildirir ki, biz YPG ilə əməkdaşlıq edəcəyik. Əslində, bunu bir qədər yumşaq başa düşmək olar. Yəni, D.Tramp R.T.Ərdoğanla razılaşır, amma ABŞ-ın güc strukturları amerika liderinin üstündən adlayaraq öz istədiklərini edir. Yəni burada D.Tramp günahsızdır. Lakin bu, ABŞ prezidentinin təsadüfi seçildiyi təqdirdə belə anlaşıla bilərdi. Bildiyimiz kimi, ABŞ-da dərin dövlət daha güclüdür. Prezidentin özündən də üst, lakin görünməyən, pərdəarxası qurum var. Ona görə də ölkə liderinin əvvəl dediklərini proqramın birinci hissəsi hesab etmək olar. Ən azı Türkiyə siyasi elitasında R.T.Ərdoğanın ABŞ tərəfindən aldadıldığı mövzuya çevriləcək”.

V.Hətəmov əlavə olaraq qeyd etdi ki, Qərb Türkiyəni həmişə Yaxın Şərqdə "dişsiz” etmək istəyir. Yəni müsəlman dövlətləri arasında texniki-hərbi cəhətdən inkişaf etmiş Türkiyə dövlətinin güclənməsi Qərb tərəfdən həzm oluna bilməzdi.

Hicranə İsmayılova

Xeberle.com

Siyasət bölməsi