"Bu gün Azərbaycan və İsrail dövlətləri strateji tərəfdaşlardır. İsrail Dağlıq Qarabağ münaqişəsində birmənalı şəkildə Azərbaycanın ərazi bütövlüyünü dəstəkləyir və münaqişənin həllini yalnız beynəlxalq hüququn tələblərinə uyğun olaraq – Azərbaycanın ərazi bütövlüyü çərçivəsində görür”.
Bu sözləri beynəlxalq münaqişələr üzrə tanınmış ekspert, Qərbi Kaspi Universitetinin (əvvəlki Qərb Universiteti) "Multikulturalizm” Mərkəzinin rəhbəri Arye Qut universitetin tələbələri üçün təşkil olunmuş mühazirədən sonra jurnalistlərə açıqlamasında deyib.
Ekspert qeyd edib ki, İsrail hər zaman Azərbaycanın yanındadır və ərazi bütövlüyünün bərpa olunmasına çalışır: "İsrail şirkətlərinin bir hissəsi Azərbaycanın hərbi kompleksinin inkişafında və möhkəmlənməsində mühüm rol oynayır. 2016-cı ilin aprel hadisələrindən sonra çevik əks-hücum zamanı erməni ordusunun müdafiə xətti məhv edildi, Azərbaycan Ordusu isə strateji əhəmiyyətli bir neçə yüksəkliyi və yaşayış məntəqəsini öz nəzarəti altına qaytardı.
Həmin dövrdə, yəni bir il bundan əvvəl biz Ermənistanda real antiisrail isteriyasının və antisemitizmin şahidi olduq. Hətta İsraildəki erməni icması Azərbaycan-İsrail tərəfdaşlığına qarşı etiraz nümayişləri keçirdi. İsrail ilə Azərbaycanın hərbi əməkdaşlığı barəsində Ermənistanın tənqidi mövqeyinə gəldikdə vurğulamaq lazımdır ki, Azərbaycan və İsrail öz dostlarını və tərəfdaşlarını yalnız özləri seçir və hərbi-texniki sahədə strateji tərəfdaşlığın və əməkdaşlığın səviyyəsini bu ölkələr özləri müəyyən edir. Üstəlik, heç kəsin bu prosesə müdaxilə etməyə haqqı yoxdur.2016-ci ili aprel döyüşlərində bir daha gördük ki, İsrail texnologiyası Azərbaycanın hərbi gücünə güc qatır. Belə tərəfdaşlıq fonunda Ermənistanda yəhudilərə və İsrailə qarşı münasibət aydındır. Buna baxmayaraq İsrail hər zaman söyləyir ki, Azərbaycanın yanındadır”.

Xəbərdən istifadə edərkən istinad etmək vacibdir.