Rusiya və Ermənistan məsələnin sülh yolu ilə həllinə sadiq deyil. KTMT-də qəbul edilən sənəddən də məlum olur ki, onlar bölgədə qarşıdurma mühitinin saxlanılmasına yardım edirlər və bu qarşıdurma ilə bölgəni öz təsir dairələrində saxlamaq istəyirlər.
Politoloq Qabil Hüseynli KTMT-nin dövlət başçılarının Qarabağla bağlı qəbul etdiyi bəyanata münasibət bildirərkən deyib. O bildirib ki, bu bəyanatdan belə görünür ki, Rusiya və Ermənistan Avropa Birliyinin Şərq Tərəfdaşlığı sammitində ərazi bütövlüyü və separatizmə qarşı mübarizə ilə bağlı qəbul etdiyi sənədin doğurduğu həyəcan içərisindədir:
"Çünki ilk dəfədir ki, bu cür mötəbər təşkilatda ərazi bütövlüyü və separatizmə qarşı mübarizə ilə bağlı yüksək mahiyyətli bir sənəd - Helsinki Yekun Aktı qəbul edilib. Bu sənəd qəbul ediləndən sonra ermənilərin qondarma öz müqəddaratını təyin etmə hüququ ilə çıxış etmələri üçün şərait demək olar ki, yox dərəcəsinə enib. Bundan həyəcanlanan Ermənistan Rusiya vasitəsi ilə KTMT-nın digər üzvlərini də bu prosesə cəlb etməyə çalışır. Görünən odur ki, Azərbaycan öz ərazi bütövlüyünü təmin etmək və sülhyaratma prosesində həm BMT-nin qəbul etdiyi qətnamələri, həm də Helsinki Yekun Aktının ərazi bütövlüyü prinsipini əsas götürərək, problemin həllinə girişdiyi bir zamanda KTMT beynəlxalq hüququn normalarına uyğun olmayan və ərazi bütövlüyü ilə yanaşı, xalqların öz müqəddaratını təyin etmə prinsipini irəli sürməklə AB-nin qəbul etdiyi sənədə bir növ alternativ sənəd ərsəyə gətirmək niyyətindədir. Zənnimcə, bu sənəd elə də böyük beynəlxalq əhəmiyyətə malik olmayacaq. Çünki əraziyə gəlmə əhali olan ermənilərin bölgədə yaratdığı qarşıdurma nəticəsində Azərbaycana xeyli ziyan dəyib, əraziləri işğal edilib və yerli əhali öz yurd-yuvalarından didərgin düşüb. Bundan bütün dünya xəbərdardır”.
Politoloq qeyd edib ki, ermənilərə ikinci bir erməni dövlətinin yaradılması nə beynəlxalq hüququn şərtlərinə, nə də Helsinki Yekun Aktının ruhuna uyğun gəlir:
"Bu nöqteyi-nəzərdən KTMT-də qəbul edilmiş sənəd heç də mövcud reallığı və beynəlxalq hüquq normalarını, eləcə də BMT-nin qəbul etdiyi sənədləri əks etdirmir. Əksinə, bu bəyanat həmin sənədlərin ruhuna və tələblərinə əks olan bir müddəanı (xalqların öz müqəddaratını təyinetmə prinsipi) populyarlaşdırmağa və həll probleminə daxil etməyə çalışır. Bu isə prosesdə əvvəl-axır qarşıdurmanın yaranmasına və sülhyaratma prosesinə zərbə vurulmasına hesablanmış bir addımdır. Azərbaycan KTMT-nin qəbul etdiyi bu bəyanatla sözsüz ki, razılaşa bilməz. Çünki xalqların öz müqəddaratını təyinetmə prinsipi köhnəlmiş və separatizmi dirçəldən, qol-qanad verən bir prinsipdir. Son Kataloniya hadisələri sübut etdi ki, beynəlxalq separatizmə dəstək verilməsi çox təhlükəlidir və dünyada nəticəsi proqnozlaşdırıla bilməyən böyük dağıntıya və qarşıdurmalara gətirib çıxara bilər. KTMT-nin bu bəyanatının ruhu əsasən buna hesablanıb. Azərbaycanın KTMT-dən daha ölçülü-biçili addım atılmasını gözləməyə haqqı var”.
Qeyd edək ki, Kollektiv Təhlükəsizlik Müqaviləsi Təşkilatının dövlət başçıları Qarabağla bağlı bəyanat qəbul ediblər. Bəyanatda Dağlıq Qarabağ probleminin ərazi bütövlüyü ilə bərabər, xalqların öz müqəddaratını təyin etmə hüququ da yer alıb.
(axar.az)

Xəbərdən istifadə edərkən istinad etmək vacibdir.