Ukraynada cərəyan edən hadisələrlə bağlı Politoloq Qabil Hüseynli Xeberle.com-a bildirib ki, M.Saakaşvilinin siyasəti Ukrayna üçün təhlükəlidir. "Mən belə hesab edirəm ki, Qərb ölkələri, ilk növbədə isə Amerika yenə də Ukraynanın daxili işlərinə qarışır və prosesləri idarə edir. M.Saakaşvili haqqında üç maddə ilə cinayət işi qaldırılmasına baxmayaraq, onu ev dustağı belə etməyə məhkəmənin cürəti çatmadı. Bəziləri Ukraynada qarışıqlığın olmasını, sakitliyin pozulmasını istəyir. Bunun başında isə Rusiya durur. Ancaq çox qəribədir ki, Amerika Ukraynanın daxili işlərinə qarışmaqda və M.Saakaşvilini qorumaqda davam edir. M.Saakaşvili əgər belə igid, inqilabçı adam idisə, necə ki, Ukraynaya zorla, hətta polislərin müqavimətlərinə baxmayaraq sərhədi keçdi, eləcə də gedib Gürcüstanda partiyasının başında dayanaraq, hakimiyyətə can atardı. İndi başa düşə bilmirəm ki, onun yad ölkədə meydan sulaması və qarışıqlıq yaratması hansı məqsədə xidmət edir. Doğrudur, Ukraynanın korrupsiya problemləri var. Amma indiki halda M.Saakaşvilinin siyasi mübarizəsi Ukraynanın zərərinə işləyir. Zənnimcə, məhkəmənin qorxaqlığı müxtəlif yozumlardan xəbər verir. Ən sonda isə qeyd edim ki, mən M.Saakaşvilini Ukrayna hakimiyyətində görmürəm".

 

 

Politoloq Elxan Şahinoğlu isə düşünür ki, Ukrayna cəmiyyəti Saakaşvilini nə prezident, nə də ki, baş nazir kimi görmək istəmir. "Gürcüstanın keçmiş prezidentinin hakimiyyətə iddiası var və özünə artıq partiya da yaradıb. Onun həbsdən çıxan kimi bir açıqlaması oldu ki, prezidentliyə iddiası yoxdur. O, yəqin ki, parlament seçkilərinə hazırlaşacaq. Təbii ki, buna səbəb olan amillərdən biri də onun tərəfdarlarının Ukraynada olmasıdır. M.Saakaşvili Ukraynanın hazırkı prezidenti P.Proşenkonun əsas rəqibidir. Əgər ki, o, parlamentdə kifayət qədər səs toplasa, müəyyən iddialar irəli sürəcək. Ancaq, mən inanmıram ki, Ukrayna cəmiyyəti M.Saakaşvilini nə prezident, nə də ki, baş nazir seçsin. Zənnimcə, P.Proşenkonu Ukraynada dəstəkləyənlər daha çoxdur".