Məlumdur ki, bu gün Türkiyə prezidenti Rəcəb Tayyib Ərdoğanın çağırışı ilə İstanbulda "İslam Əməkdaşlıq Təşkilatı”nın fövqəladə konfransı keçirilib. Konfransda R.T.Ərdoğandan sonra çıxış edən Fələstin lideri Mahmud Abbas bildirib ki, Amerika Birləşmiş Ştatlarının (ABŞ) prezidenti Donald Tramp Qüdsü İsrailin paytaxtı kimi tanıdıqdan sonra, artıq onlar heç vaxt barışdırıcı mövqedə ola bilməzlər. O xüsusən vurğulayıb ki, hətta barışdırıcı mövqeyini Amerika öz üzərinə götürsə belə, biz bu missiyadan imtina edəcəyik. Xeberle.com olaraq mövzu ilə bağlı politoloq Zərdüşt Əlizadədən kiçik bir müsahibə aldıq.
- Zərdüşt müəllim, bununla demək olarmı ki, Amerika bu mövqeyi ilə özünə qarşı yeni bir cəbhə yaratdı?
- Xeyr, çünki müsəlman dövlətləri cəbhə yaratmaq iqtidarında deyillər. Amerikaya kəskin tənqidi münasibət bəsləyən müsəlman ölkəsi İran və müəyyən mənada Türkiyədir. Hansı ki, bu ölkələr müstəqil və Amerikadan asılı olmayan dövlətlərdir. Lakin Amerikanın əlinə baxan, onun xeyir-duası və dəstəyi ilə hakimiyyətdə olan ölkələr necə cəbhə yarada bilərlər?!
- Belə bir məqamda islam dövlətlərinin həmrəyliyi yarana bilərmi? Yaranarsa, nə qədər davam edə bilər?
- Müsəlman ölkələri bayram, həmrəylik günü keçirə,bir-birilərini orden və medallarla təltif edə, eyni süfrə arxasında otura bilərlər. Amma çox təəssüflər olsun ki, bu ölkələr arasında müsəlman həmrəyliyi yoxdur. Onlar parçalanıblar, bir-birilərilə didişirlər, boğuşlar, kəskin rəqabətdədirlər və məhz Qərb dünyasından, elə ilk növbədə Amerikadan dəstək almağa çalışırlar ki, müsəlman qardaşlarının başını kəsə bilsinlər.
- Beləliklə Amerikanın hegemonluq yolunun sonuna gəldiyini düşünə bilərikmi?
- Amerikanın hegemonluğunun mayasında müsəlmanların tənqidi münasibəti deyil, onun sənayə, hərbi, elmi qüdrəti, əhalisinin işgüzarlığı, cəmiyyətinin səmərəsi durur. ABŞ-ın hegemonluğunu təmin edən ünsürlərin hamısı onun öz əlindədir və o, həqiqətən dünyaya ağalıq edərək öz sözünü deyir. Müsəlmanlar da pərakəndə və qeyri-səmərəli həyat tərzləri ilə bu ağalığa qarşı durmaqda acizdirlər. Sonuncu dəfə müsəlmanlar Osmanlı imperiyasının yarandığı ilk vaxtlarda dünyada söz sahibi idilər. Amma daha sonra süqut etdilər, tənəzzülə uğradılar, parçalandılar və dağıldılar. Hazırda çox məzlum vəziyətdədirlər və bu vəziyyətdən çıxmaq üçün böyük inkişaf yolu keçməlidirlər. Heç olmazsa, özünüdərk prosesi başlamalıdır. Yalançı keçmişə boylanan özünüdərk yox, gələcəyə baxan, elm,tərəqqi, inkişafla ayaqlaşan özünüdərk prosesi başlamalıdır. O da ki, yoxdur. Əksinə müsəlman dövlətlərinin liderlərinin əksəriyyəti öz xalqlarını qarət etməklə, ciblərini doldurmaqla, pullarını Qərb dünyasına daşımaqla məşğuldurlar. Belə bir müsəlman dünyasının müqavimət gücü ola bilməz.
Elnarə Salamova
Xeberle.com
Siyasət bölməsi
Xəbərdən istifadə edərkən istinad etmək vacibdir.
