Paris İsrailin baş naziri Benyamin Netanyahunun İranın nüvə proqramı üzrə informasiyasını yoxlamağa və qiymətləndirməyə çağırıb.
Publika.az "RİA-Novosti” agentliyinə istinadən xəbər verir ki, bu haqda Fransanın Xarici İşlər Nazirliyinin bəyanatında deyilir.
"Bu informasiyanı ətraflı öyrənmək və qiymətləndirmək lazımdır”, - bəyanatda bildirilir.
Qeyd edək ki, dünən İsrailin baş naziri Benyamin Netanyahu İsrail kəşfiyyatının İranda hərbi nüvə proqramının olduğunu sübut edən yarımton məxfi material əldə etdiyini açıqlayıb. O, ifşaedici bəyanat ilə 3 il əvvəl İranın nüvə proqramı ilə bağlı əldə olunmuş razılaşmalara yenidən baxılmasına dair beynəlxalq müzakirələrin qızğın vaxtında yerli televiziyanın canlı yayımında çıxış edib.
"Bu fayllar inandırıcı şəkildə sübut edir ki, İran onda heç vaxt hərbi nüvə proqramının olmadığını yalan deyib", - Netanyahu bildirib.
Onun sözlərinə görə, bir neçə həftə əvvəl İsrail kəşfiyyatı İranda "Əhməd" adlı layihənin olduğunu sübut edən 55 səhifəlik mətn sənədləri də daxil olmaqla yarımton material əldə edib.
Netanyahu İranı nüvə barədə sövdələşmədən sonra "hərbi nüvə "know how"sunu saxlamaq və genişləndirməkdə" ittiham edib.
"İran 2015-ci ildə yalan danışaraq, IAEA-da sövdələşmənin tələb etdiyi kimi hər şeyi etiraf etməyib. İran sövdələşməsi, nüvə sövdələşməsi yalana, İran yalanına və hiyləsinə əsaslanır", - deyə baş nazir əlavə edib.
İranın xarici işlər nazirinin müavini Abbas Araqcı İsrailin baş naziri Binyamin Netanyahunun Tehranın hərbi nüvə sahəsində əldə etdiyi nailiyyətlər barədə bəyanatını "uşaq hərəkəti və mənasız şou" adlandırıb.
İranın xarici işlər naziri Məhəmməd Cavad Zərif isə deyib ki, İsrailin Tehranda gizli hərbi nüvə proqramının olmasına dair ittihamları "köhnədir" və ötən illərdə Atom Enerjisi üzrə Beynəlxalq Agentlik (AEBA) tərəfindən baxılıb".
"ABŞ prezidenti Donald Tramp sövdələşməni ləğv etmək üçün IAEA tərəfindən əvvəllər nəzərdən keçirilən başqa cür ifadə edilmiş köhnə bəyanatlardan yapışıb. Necə də münasibdir. Mayın 12-nə cəmi bir neçə gün qalmış "canavarlar" qışqıran oğlan uşağının ehtimal edilən kəşfiyyat tapıntılarının planlaşdırılmış vaxt seçimi. Lakin Trampın bayram etmək səyləri həqiqəti ortaya çıxardı" – deyə Zərif öz Tvitter səhifəsində yazıb.
Ağ Ev isə İsrailin İranın nüvə silahı işləyib hazırlamasına dair bəyanatı təsdiq edib.
"İsrailin İranın nüvə silahı işləmləri haqqında bəyanatı ilə bağlı: Bu faktlar Birləşmiş Ştatların çox əvvəl bildikləri ilə üst-üstə düşür. İran nüvə silahının gizli işlənmə proqramına malikdir, o bunu dünya ictimaiyyətindən və öz xalqından gizlətməyə çalışsa da, buna nail ola bilmədi", - deyə bəyanatda bildirilir.
Qeyd edək ki, ABŞ prezidenti Donald Tramp mayın 12-də nüvə sazişindən çıxıb-çıxmamaq barədə son qərarı açıqlamalıdır.

Xəbərdən istifadə edərkən istinad etmək vacibdir.