İrana qarşı sanksiyaların bərpası birbaşa olmasa da, dolayısı ilə Azərbaycana da təsir göstərə bilər.
Bu sözləri Axar.az-a ABŞ-ın İranla nüvə razılaşmasından çıxmasının nəticələri barədə danışarkən Milli Məclisin İqtisadiyyat, sənaye və sahibkarlıq komitəsinin üzvü Vahid Əhmədov deyib. Millət vəkilinin sözlərinə görə, Tehrana qarşı sanksiyalar nəinki İrana, eyni zamanda, İranla iqtisadi əlaqələri olan dövlətlərə də təsirsiz ötüşməyəcək:
"Azərbaycanla İran arasında iqtisadi münasibətlər çox inkişaf edib. Çünki hər iki ölkə dəmiryolu ilə əlaqədar bir-birinə investisiya qoyub. İran Azərbaycanda dərman fabriki, avtomobil zavodunun tikintisi ilə bağlı bir sıra məsələlərdə yaxından iştirak edir. Ona görə də İrana qarşı sanksiyaların bərpası birbaşa olmasa da, dolayısı ilə Azərbaycana da təsir göstərə bilər. Bildiyiniz kimi, İran dünya bazarına neft ixrac edir və sanksiyalar ucbatından bu neftin ixracında problem yarana bilər. Bir sözlə, İrana qarşı sanksiyalar dünya iqtisadiyyatına öz təsirini göstərməkdə davam edəcək”.
Millət vəkili hesab edir ki, ABŞ-ın İranla bağlı apardığı siyasət hələ müəyyən müddət davam edəcək:
"Çünki nüvə silahı hazırda dünyada əsas problemlərdən biridir. İran güclü və böyük dövlətdir və ABŞ-la müəyyən razılıqlar ola bilər”.
Qeyd edək ki, İranla nüvə anlaşmasından çıxdığını bəyan edən ABŞ Prezidenti Donald Tramp bir müddət öncə Tehrana qarşı sanksiyaların bərpa ediləcəyini bildirib.

Xəbərdən istifadə edərkən istinad etmək vacibdir.