"Məncə Paşinyan artıq Rusiya ilə Qərb arasında seçim edib. Bu hadisələr başlayanda mən də o fikirdə idim ki, olaylar Rusiya və İrana qarşı istiqamətlənib”.

Bu sözləriXeberle.com-a açıqlamasında politoloq Nəzakət Məmmədova Ermənistanın baş naziri Nikol Paşinyanın Armen Qriqoryanı Təhlükəsizlik Şurasının katibi postuna gətirməsinə münasibət bildirərkən qeyd edib. Onun sözlərinə görə, bu təyinatlarla artıq N.Paşinyan sübut edir ki, onun hakimiyyətə gəlməsi Qərbin layihəsi idi:

 

"N.Paşinyan qərarlarını müstəqil olaraq qəbul etmir. O, heç öz gücünə hakimiyyətə gəlmək iqtidarında da deyildi. Paşinyanı az insan dəstəkləyirdi, xalq onu dəstəkləmək üçün küçəyə çıxmırdı belə. Mitinqdə insanların sayının çoxalmasına səbəb Serj Sarkisyanın "fatihə”sinin verilməsi oldu. Mən düşünürəm ki, onun hakimiyyətə gəlişi Amerika və ya Fransanın layihəsi ola bilər. Hətta Amerika ehtimalı daha böyükdür. Fransanın Yaxın Şərqdə, Afrikada Amerika Birləşmiş Ştatları (ABŞ) , İngiltərə və Türkiyə ilə maraqları toqquşur. Ona görə də ehtimallardan biri budur ki, Fransa Ermənistan üzərindəki təsirindən istifadə edərək Amerika və İngiltərəni orada sıxışdırmaq istəyir. Digər inandırıcı ehtimal da budur ki, Amerikada yaşayan yəhudi lobbisi İrana sanksiyalar ərəfəsində Ermənistanı nəzarətə almaq və İranın Ermənistan vasitəsilə dünyaya çıxışının qarşısını kəsmək, Rusiya ilə əlaqələrini zəiflətmək üçün sözügedən ölkədən istifadə edir. Bundan sonra da biz N.Paşinyanın onu hakimiyyətə gətirən qüvvələrin maraqlarını müdafiə edən təyinatlar verəcəyinin şahidi ola bilərik. Ola bilsin ki, Ermənistan İrana qarşı ölkəsindən kəşfiyyat xarakterli məqsədlər üçün istifadə olunmasına da icazə versin. N.Paşinyan artıq bu təyinatlarla sübut edir ki, onun hakimiyyətə gəlməsi Qərbin layihəsi idi. Ermənistan təbii ehtiyatları ilə olmasa da, geosiyasi baxımdan əhəmiyyətli ölkədir. N.Paşinyanı hakimiyyətə gətirən qüvvələr artıq seçim ediblər”.

Elnarə Salamova

Xeberle.com

Siyasət bölməsi

Xəbərdən istifadə edərkən istinad etmək vacibdir.