"Duqinin dediklərini biz niyə həqiqət kimi qəbul etməliyik?! Ümumiyyətlə Duqin, Kuznetsov Azərbaycanın baxışlarına uyğun fikirlər söyləyirlər. Buna görə sağ olsunlar. Amma daim belə fikirlər söyləməkləri reallıqdan uzaq bir mənzərə də yarada bilər”.

Bu sözləri Xeberle.com-a açıqlamasında politoloq Elxan Şahinoğlu Rusiyanın tanınmış politoloqu Aleksandr Duqinin Ermənistadakı hakimiyyət dəyişikliyi və onun Dağlıq Qarabağ probleminin həllinə təsiri haqda son açıqlamasına münasibət bildirərkən qeyd edib. Onun sözlərinə görə, bu, politoloqun şəxsi fikri mahiyyətini daşıyır: "Mən inanmıram ki, Serj Sarkisyan 5 rayonun qaytarılması üçün razılığa gəlib. Biz keçmişdə belə bir işartı da görməmişik. S.Sarkisyan hansı addımı ilə bizə Dağlıq Qarabağı boşaltmaq istədiyini göstərib?! Boşaltmağa hazır ola bilərdilər. Amma əsas şərtləri Dağlıq Qarabağın statusunun müəyyənləşdirilməsidir ki, biz də onu heç vaxt edə bilmərik. Ona görə də düşünürəm ki, bu, palitoloqun şəxsi fikri mahiyyətini daşıyır”.

Qeyd edək ki, Aleksandr Duqinin Ermənistadakı hakimiyyət dəyişikliyi və onun Dağlıq Qarabağ probleminin həllinə təsiri haqda son açıqlamasında Sarkisyanın 5 rayonun Azərbaycana qaytarılmasına razılaşdığını və baş nazir olandan sonra bunu reallaşdıracağını vəd etdiyini bildirmişdi.