Avropa Azərbaycanı müdafiə etməlidir.
Bu sözlər Avropa Parlamentinin Beynəlxalq Ticarət Komitəsi sədrinin müavini və Avropa İslahatçılar və Mühafizəkarlar İttifaqının prezidenti Yan Zahradilin "Avroaktiv” (Euractiv.com) saytında dərc olunan məqaləsində yer alıb. Onun sözlərinə görə, AB və Azərbaycanın münasibətləri Bakını AB-nin qeyri-stabil və etibarsız tərəfdaş olması haqqında fikrə gəlməyə məcbur edib:
"Azərbaycan AB-nin dəstəyini haqq edir. Xüsusilə Rusiya və İran arasında artan gərginlik bu dəstəyə ehtiyacı daha da artırır. Bir müddət öncəki hadisələr Azərbaycanla münasibətlərin gücləndirilməsi istiqamətində hərəkətin olduğunu göstərir. Azərbaycan və AB arasında əməkdaşlıq şurasının iclası baş tutdu, daha sonra AB-Azərbaycan arasında parlament əməkdaşlığı komitəsinin iclası oldu. Avropa İslahatçılar və Mühafizəkarlar İttifaqı hazırda Bakıda genişmiqyaslı beynəlxalq konfrans təşkil edir. Əgər Azərbaycanı AB-nin maraqları sferasından çıxarsaq, bu, Rusiyanın daha bir qələbəsi olacaq. İranla münasibətlər isə asan deyil. Hazırda İranda 30 milyona yaxın etnik azərbaycanlı yaşayır, lakin onlar fundamental insan haqlarından, öz doğma dillərindən istifadə haqlarından məhrum ediliblər.
Azərbaycanın İrana münasibətdə siyasəti neytraldır. Bakı çalışır ki, İranın daxili işlərinə müdaxilə etməsin. İran Azərbaycana təsir etməyə, ənənəvi islam həyat tərzinin Bakı tərəfindən qəbul edilməsinə çalışır”.
Qeyd edək ki, müəllif Avropa Mühafizəkarlar və İslahatçılar Alyansının bir neçə gündən sonra Bakıda keçiriləcək sammiti barədə də məlumat verib. O, bu sammitin Pan-Avropa siyasi partiyası tərəfindən keçiriləcək ilk belə tədbir olacağını vurğulayıb. Müəllif tədbirin Azərbaycan Xalq Cümhuriyyətinin 100 illiyinin qeyd edildiyi bir vaxta təsadüf etməsinin rəmzi məna daşıdığını yazıb. (Axar.az)

Xəbərdən istifadə edərkən istinad etmək vacibdir.