Ankara "S-400” zenit-raket komplekslərinin çatdırılmaları üzrə Rusiya ilə imzalanan razılaşmanın ləğv edilməsi barədə Vaşinqtonun tələbini rədd edib.
Bu haqda diplomatik mənbələrə istinadən "Hürriyət” qəzeti bildirir.
Qeyd edilir ki, "S-400” kompleksləri haqqında məsələ son aylarda Türkiyə-ABŞ danışıqlarında dəfələrlə gündəmə gəlib. Məsələ sonuncu dəfə ABŞ-ın dövlət katibi Maykl Pompeo və Türkiyənin Xarici İşlər Nazirliyinin başçısı Mövlud ÇavuşoğlununVaşinqtondakı görüşündə müzakirə edilib. ABŞ üç əsas səbəbə görə, Ankara-Moskva razılaşmasına qarşı çıxır. Birincisi, bu, Rusiyanın təcrid edilməsi üzrə ABŞ-ın planlarına ziddir. 2017-ci ilin iyulunda ABŞ Konqressi tərəfindən qəbul edilmiş qanun layihəsi Rusiyadan silah alan ölkələr və şirkətlər barəsində sanksiyaların tətbiqini nəzərdə tutur. İkincisi, ABŞ-da qorxular var ki, "S-400”lər NATO təyyarələri, xüsusi halda, "F-35” beşinci nəsil qırıcı-bombardmançıları üçün təhlükə yaradacaq. Üçüncüsü, müttəfiqlərinə "Patriot” zenit-raket sistemlərini çatdıran ABŞ-ın ticarət maraqları var.
ABŞ Türkiyəni təhdid edir ki, "S-400”lərin alınması barədə sazişin ləğv edilməməsi Ankaraya qarşı sanksiyalara səbəb ola bilər. Türkiyənin rəsmi şəxsləri bu tələbi qətiyyətlə rədd ediblər. Türk tərəfi öz mövqeyini onunla əsaslandırıb ki, Suriyada vəziyyətə görə bu ölkə ilə münasibətlər pisləşərsə, İran tərəfindən raket hücumu təhlükəsi mövcuddur. Eyni zamanda ABŞ təkid edirdi ki, "S-400” alınsa belə, Türkiyə onlardan istifadə etməməlidir. "Hürriyyət” nəşrinə danışan mənbənin sözlərinə görə, bu, real gözlənti deyil.
ABŞ-ın tələbini rədd edən Türkiyə NATO-nun təyyarələrinin təhlükəsizliyi haqqında ABŞ-ın narahatlığının aradan qaldırması üçün birgə iş aparmağı təklif edib. Qeyd edilir ki, ABŞ prezidenti Donald Tramp türk həmkarı Rəcəb Tayyib Ərdoğanı inandırmağa çalışırdı ki, ABŞ əvvəlki Amerika administrasiyasından fərqli olaraq Türkiyəyə "Patriot” zenit-raket sistemlərini verməyə hazırdır. Ankara cavabında bildirib ki, Amerika administrasiyası Konqresin razılığını təmin edə biləcəyi halda, "Patriot”ların alınması haqqında məsələyə baxa bilər.
Xatırladaq ki, 2017-ci ilin dekabrında Türkiyə və Rusiya "S-400”lərin alınması üzrə kredit razılaşması imzalayıb. Ankara bu komplekslərin iki batareyası alacaq. Tərəflər həmçinin Türkiyədə "S-400”lərin istehsalının inkişafı sahəsində texnologiya əməkdaşlığı haqqında razılaşıblar.
ABŞ-ın dövlət katibinin köməkçi Uess Mitçell bir müddət əvvəl bildirib ki, "S-400”lərin alınması "F-35” qırıcılarının Türkiyəyə çatdırmasına mənfi təsir edə bilər. Amerika senatorları qrupu "F-35”lərin Türkiyəyə çatdırılmasını qadağan edən qanun layihəsini təqdim ediblər. Çavuşoğlu söz verdi ki, qırıcıların Türkiyəyə çatdırılması bloklanarsa, Ankara Vaşinqtona qarşı cavab addımları atacaq. (Publika)
Xəbərdən istifadə edərkən istinad etmək vacibdir.
