"Bu görüşün praktiki nəticələr verəcəyinə o qədər də inanmıram.Çünki Şimali Koreya prezidenti Kim Çen İn xarakter etibarilə dəyişkən və dünya ictimai rəyinə o qədər də əhəmiyyət verməyən insandır”.

 

Bu sözləri Xeberle.com-a açıqlamasında politoloq Qabil Hüseynli ABŞ przidenti D.Tramp ilə Şimali Koreya prezidenti K.Ç.İnin Sinqapurda baş verən görüşlərinə münasibət bildirərkən qeyd edib. Onun sözlərinə görə, görüş yerinin məhz Sinqapur olaraq seçilməsində hər iki liderin arzusu öz əksini tapıb:

 

"Amerikanın Şimali Koreya ilə əlaqələri intensivləşdirməyə çalışmasına səbəb nüvə istehsalını dayandırmaq, tərkisilaha nail olmaqdır. Buraya həmçinin uzaqmənzilli ballistik raketlər də daxildir. Şimali Koreyanın əsas strateji məqsədi nüvə dövlətinə çevrilmək və nüvə silahı vasitəsilə təhdid yolu ilə "sərsəm” ideyaları həyata keçirməkdir. Mən imzalanmış sazişə və bu sazişdə qaldırılan tələblərə Şimali Koreyanın sona qədər sadiq olacağına inanmıram. Amerika anormal dövləti və onun başçısını müəyyən dəyərlər, baxışlar ətrafında nizama salmağa cəhd edir. Amma həmin dövlətin bu ideya və dəyərlər çərçivəsində hərəkət edəcəyi inanılası deyil. Çünki orada çox qeyri-adi rejim, sülalə hakimiyyətdədir. Üstəlik də K.Ç.İnin ruhi-psixoloji durumu ciddi suallar doğurur. Orada sözün açığı kazarma tipli bir cəmiyyət yaranıb və insanların hüquqları tapdalanmaqda, onlar kölə vəziyyətində saxlanılmaqda davam edir. Şimali Koreya kimi bir ölkənin insanların boğazından kəsərək nüvə dövləti olmaq üçün can atmasının nə mənası var?! Ən birinci insanların maddi rifahı, ölkənin çiçəklənməsi haqqında düşünmək lazımdır. Bir dövlətin ki, gəlirlərinin 60 faizindən çoxu nüvə silahları, ballistik raketlərin yaradılmasına yönəldilir, mən onu anormal dövlət hesab edirəm. Şimali Koreya lideri ikinci görüşü öz ölkəsinin paytaxtına, Pxenyana təyin etməklə bir növ D.Trampı öz ayağıma gətirdim təsəvvürü yaratmağa çalışır. İlk görüşün Asiya qitəsində baş tutması da məhz bu xəyallara xidmət edirdi. Amma Sinqapur Asiya ölkəsi olsa da, dəyərlər və inkişaf səviyyəsi baxımından Qərb ölkələri obrazında yaradılmış çoxmillətli, balaca, texnologiyanın yüksək inkişaf etdiyi bir ölkədir. Bu nöqteyi nəzərdən mən belə hesab edirəm ki, Asiya dövləti olsa da Sinqapurun seçilməsi təsadüfi deyildi. Burada hər iki liderin arzusu öz əksinə tapıb. Biri Avropa dəyərlərinə sadiq olan bir dövlətin seçiməsi ilə, digəri isə bu ölkənin Asiyada yerləşməsi ilə özünə təsəlli verir”.