Bu sözləri Xeberle.com-a politoloq Nəzakət Məmmədova zirvə toplantısını şərh edərkən deyib.

N. Məmmədova bildirib ki, Suriyada münaqişənin bitməsinə ciddi cəhdlər göstərilsə də buna nail oluna bilməyib. Əvəzində isə münaqişə yenidən qızışıb:

"Suriya münaqişəsinin sona çatdığı bütün dünya bilirdi. Lakin bu günlərdə Rusiyanın İdlibi bombardman etməsiylə münaqişə yenidən başladı və bu da ərazidə müharibənin hələ də bitmədiyini bir daha sübut etdi. Tehranda keçiriləcək zirvə toplantısında sözsüz ki, Suriyadakı vəziyyət və gələcək perspektivlər müzakirə oluna bilər. Bundan əlavə ABŞ-la Türkiyə arasında razılaşma əldə edildi və nəticədə PKK VƏ PHD kürd silahlı birləşmələrinin tərkisilah olunması prosesi baş verdi. Bununla yanaşı, ABŞ terror qruplaşmalarından silahları geri aldı. Digər tərəfdən onların Əsədlə görüşləri keçirildi. Bütün bu baş verənlər münaqişənin həlli istiqamətində dönüş idi. Rusiya Əsədlə Ərdoğanı barışdırmaq istəyir, çünki Əsədin hakimiyyətdə qalmasında Türkiyə də söz sahibidir. Rusiya ilə İran hələki Əsədi hakimiyyətdə saxlamaq istəyir, buna yeganə etiraz edən tərəf isə Türkiyədir. Zirvə toplantısında Türkiyəni razı salıb Əsədi hakimiyyətdə qalmasını təmin etmək kimi məsələlər də var. Əsəd özü də bu razılaşmanın tərəfdarıdır və bunun əvəzində o Türkiyəni Suriyada müharibədən sonrakı bərpa işlərinə cəlb etməklə bu ölkənin rəğbətini qazanmaq istəyir. Çünki Türkiyəni bu işə cəlb etməklə ona iqtisadi baxımdan müsbət faydası ola bilər".

Politoloq görüşdə digər məsələlərin də müzakirə obyekti olacağını vurğulayıb: "Görüşdə, əsasən terrora qarşı mübarizə üsulları, Suriyanın yenidən qurulması məsələsi, ölkənin gələcək siyasi sistemində hansı qüvvələrin iştirak edə biləcəyi barədə hər üç ölkə arasında razılaşmalar əldə olunacaq. Böyük ehtimal görüşdə fikir ayrılıqları olmayacaq, çünki hazırki şəraitdə, xüsusilə də ABŞ-ın hər üç ölkəyə sanksiya tətbiq etdiyibir vaxtda bu ölkələr heç vaxt olmadığı qədər müttəfiq olmağa məcburdurlar. Bütün bunları nəzərə alsaq prinsipal olaraq razılaşmalar əldə olunacaq. Qarşıda onları daha böyük təhlükələr gözləyir. Ən azından indi əlbir olub qarşılarında duran ABŞ-a qarşı birlikdə mübarizə aparmalıdırlar. Fikir ayrılıqları olarsa ABŞ onları məğlub edib, bütün planlarının üstündən xətt çəkib Yaxın Şərqdəvəziyyəti öz istədiyi kimi nəzarətə ala bilər.Tehran görüşü əvvəlkilərə nisbətən daha çox razılaşmalar və yaxınlaşmalar əldə olunacağı ilə yadda qalacaq".

Xədicə Səxavətqızı

Xeberle.com