Milli Məclisin (MM) sədri Oqtay Əsədov sentyabrın 12-də ATƏT-in baş katibi Tomas Qremingerlə görüşüb.
Xeberle.com Oxu.Az-a istinadən xəbərinə görə, O.Əsədov ATƏT-in baş katibinin ölkəmizə səfərinin əlaqələrin inkişafına böyük töhfə verəcəyinə əminliyini ifadə edib.
Azərbaycanla ATƏT arasındakı münasibətlərdən danışan MM-in sədri ölkəmizin 25 ildən artıqdır qurumla uğurlu əməkdaşlıq etdiyini bildirib.
Ermənistan-Azərbaycan münaqişəsi və onun həlli ilə bağlı danışıqlar prosesi barədə məlumat verən O. Əsədov bildirib ki, ATƏT-in Minsk qrupu indiyənədək işğalçı dövlətə qarşı hansısa bir tədbir görməyib:
"Bu da Minsk qrupuna olan inamı azaldır. Bütün bunlara baxmayaraq, Azərbaycan Minsk qrupunun danışıqlarına nikbin baxır”.
MM-in sədri ATƏT-in Ermənistan-Azərbaycan münaqişəsinin sülh yolu ilə həllinə dəstək göstərəcəyinə əminliyini ifadə edib.
O. Əsədov qeyd edib ki, Azərbaycan regionda həyata keçirilən enerji layihələri çərçivəsində böyük uğurlar qazanıb:
"Ölkəmiz Avropanın enerji təhlükəsizliyinin təmin olunmasında mühüm rol oynayır”.
ATƏT-in baş katibi Tomas Qreminger isə Azərbaycana səfəri barədə məlumat verib, ilk dəfə ölkəmizə altı il bundan əvvəl gəldiyini deyib.
O bildirib ki, səfərin əsas məqsədi Azərbaycanla ATƏT arasında münasibətləri dərinləşdirməkdən ibarətdir.
Qeyd edib ki, Azərbaycanla ATƏT arasında münasibətlərin inkişafının davam etməsi üçün müəyyən imkanlar mövcuddur:
"Potensial imkanlardan istifadə etməklə Azərbaycanla ATƏT arasında əməkdaşlığı daha da möhkəmləndirmək mümkündür”.
Xəbərdən istifadə edərkən istinad etmək vacibdir.
